Romana gipili gyud ni Rama-garbo

CEBU, Philippines -  Gikompirmar ni Police Regional Office (PRO)-7 Director Marcelo Garbo Jr. nga sigurado na nga si Senior Superintendent Noli Romana maoy matudlo nga direktor sa kapolisan sa dakbayan sa Sugbo.

Matud ni Garbo nga wala nay laing mahimo ang kadagkoan sa Camp Crame karon nga ang ngalan ni Romana gipili na ni Mayor Michael Rama nga maoy himoong director sa Cebu City Police Office. Apan gibutyag ni Garbo nga bisan og makalingkod na si Romana sa katungdanan pagka hepe sa kapolisan dinhi sa dakbayan, magpadayon ang imbestigasyon kabahin sa kapakyas niya pagsumpo sa illegal nga sugal sa Negros Oriental.

 Matud ni Garbo nga atol sa pagdumala ni Romana isip direktor sa Negros Oriental Provincial Police Office (NOPPO) wala masumpo ni Romana ang maong illegal nga sugal.

Karong bag-o gibutyag ni Garbo nga nasakpan pa sa video footage ang duha ka sakop ni Romana nga midawat og “protection money” gikan sa usa ka gambling operator sa Negros Oriental. Gitug-an ni Garbo ngadto sa Banat News nga gimandoan niya ang iyang mga imbestigador sa PRO-7 nga mohimo’g imbestigasyon sa kapakyas ni Romana pagsumpo sa illegal nga sugal.

Dinhi sa dakbayan sa Sugbo paspas ang kampanya sa illegal nga sugal, ilabi na ang video karera.

Apan kasaligang tinubdan sa Banat News nagbutyag nga ang video karera mo-operate sa mga barangay, ilabi na sa Suba ug Pasil, panahon sa gabii apan gipasagdan lang sa mga polis.

Ang kasayuran nagkanayon nga giusab na ang kahon sa video karera aron nga panahon sa adlaw bisan pa og makit-an nga itak-op ra sa balisbisan sa panimalay dili kini dali nga mailhan.  (BANAT NEWS)