Namana sa dapit nga taw-an namatay

CEBU, Philippines - Nalumos ang usa ka mananagat samtang kini namana sa gituohang taw-an nga bahin sa dagat  didto sa barangay Pooc sa lungsod sa Sta Fe isla sa Bantayan niadtong Miyerkules sa alas 8:00 sa gabii.

Ang biktima mao si Gerry Desabelle, 29,  ulitawo, nagpuyo  sa maong lugar ug usa ka mangingisda.

Si PO2 Jeffrey Barco sa Sta. Fe Police  Station mibutyag  sa Banat News   nga ang maong mananagat kauban  ni Joselito Dumot-ol, hingkod,  kinsa  nagkasabot kining mamana.

Matud ni Dumot-ol dihang gisukit -sukit sa kapulisan  nga   samtang sila naglangoy sa dagat kalit lang niyang nabantayan nga naglisud  ang biktima nga nangayo  kaniya  og pakitabang.

Busa  iya  dayon kining gilangoy apan tungod kay distansya ang ilang nahimutangan naglutaw na kining wala nay panimuot sa iyang pag-abot ug giguyod dayon niya kini paingon sa baybayon ug gihatud sa Bantayan District Hospital.

Nagsakay  sila  sa   ambulansiya apan sa  ilang  pag-abot  didto  sa  tambalanan  igo  rang  gideklarar  sa  mga  mananambal   nga Dead on Arrival (DOA).

Si PO2 Barco  nagkanayon nga subay sa ilang mga nahipos nga impormasyon gikan sa mga molupyo sa maong lugar nga taw-an ang maong bahin sa dagat tungod kay daghan na ang nalumos ug namatay sa maong dapit.  Nasayran  usab  sa kapolisan nga  matag tuig aduna gyuy malumos  diha  sa maong dapit.

Hinuon gidudahan usab sa kapolisan nga posibling gibikogan ang biktima maoy  hinungdan sa  pagkalumos niini  ug namatay kay walay nakatabang diha-diha. (/WC) (BANAT NEWS)