Alegado, Damole nasublian sa katungdanan

CEBU, Philippines - Nasublian alang sa iyang ikaduhang termino si Mayor Teresa Alegado sa lungsod sa Consolacion sa Liberal Party human sa naangkon niining kadaugan  batok sa higpit niyang kaatbang nga si kanhi mayor Avelino Gungob sa One Cebu Party.

Lakip sa nasublian sa termino mao si bise mayor Aurelio Damole samtang gidemalas ang tulo ka konsehal sa lineup ni Alegado ug nakasud ang tulo ka sakop ni Gungob sa konseho.

Ang midaug nga mga konsehal sa line up ni Mayor Alegado mao sila si  Elenito Pahang, Benvienido Ermac, Julius Alegado, Benjamin Tibon ug  Nilo Peraren.

Samtang ang mga konsehal sa line up ni Gungob nga nakadaug mao si kanhi bise mayor Ember Alinsug nga maoy nahimong number one councilor,  ug ang mibalik sa politika nga si kanhi konsehal Arnulfo Aurelio “Taboy” Abenales sa ikalima nga pwesto.

Nabutang usab sa ikaunom nga pwesto  si Konsehal Maria Analie Gungob nga anak ni Gungob. Si Alinsug  mao ang kanhi bise mayor  samtang kanhi konsehal usab si Abenales sulod sa tulo ka termino nga natapos niadtong 2010.

Sila si Alinsug ug Abenales  maoy nakaatbang sa pagkamayor ni Alegado sa 2010  elections.  (BANAT NEWS)