ALU-TUCP mi-endosar sa BOPK

CEBU, Philippines - Si Kongresista Tomas R. Osmeña ug ang hapit tanang kandidato sa Bando Osmeña Pundok-Kauswagan (BOPK) gi-endosar sa kadagkoan sa Associated Labor Unions-Trade Union Congress of the Philippines (ALU-TUCP) nga pabotohan sa ilang 18,000 ka sakop.

Sa tanang kandidato sa BOPK, si kanhi Konsehal Nestor Archival ra maoy wala i-endosar sa kadagkoan sa ALU-TUCP kay duna sila’y usa ka kandidato sa Team Rama pagka konsehal nga ilang giapil sa line-up.

Si Art Barrit, pangulo sa ALU-TUCP Education and Training department, mipasabot nga tabangan nila si Boobi Kintanar bisan og anaa siya sa Team Rama kay ang iyang amahan nga si June Kintanar daku  og natabang  sa sibyaanan DYLA  sa pagkuha og prangkisa  niini. Nahibaw-an nga ang ALU-TUCP mihatag og katungod ni Osmeña kun kinsa sa iyang mga konsehal sa north district nga dili iapil sa pag-endosar ngadto sa mga sakop sa ALU-TUCP.

Matud ni Barrit nga nauyonan usab nga sa headquarters sa BOPK, ang Trade Union Congress Party (TUCP) makabutang usab sa ilang campaign posters aron pagpahibalo sa katawhan nga usa kini sa mga partylist.

Si Osmeña nga mitambong sa press conference didto sa opisina sa ALU-TUCP kagahapon nahinangop sa pag-endosar kanila sa dakung kahugpongan sa mga mamumuo.

Matud ni Osmeña nga ang pag-endosar sa kadagkoan sa ALU-TUCP ngadto sa ilang mga sakop daku na kini og bintaha alang sa ilang kandidatura. (BANAT NEWS)