‘Injuries’ nakita sa namatay nga gipasanginlang “shoplift”

CEBU, Philippines - Ipadala sa National Bureau of Investigation sa Cebu ang mga tissues sa nagkalain-laing organ sa gipasanginlang ‘shop lift’ nga namatay samtang anaa sa kostudiya sa mga gwardiya sa usa ka dakong department store sa dalan Colon niadtong Abril 12 ning tuiga.

Ang inahan sa biktimang si Mario Alfie Ducayan midangop sa NBI niadtong Abril 16 human magduda sa hinungdan sa kamatayon sa anak nga iyang gihulagway nga himsog ug dili masakiton.

Ang inahan di makadawat sa unang resulta sa awtopsiya sa medico legal sa PNP Crime Laboratory nga nag-ingong duna kini sakit sa baga maong midugo kini ug nakaingon sa asphyxia o ang pagkaputol sa supply sa oxygen ang gikamatyan sa iyang anak.

Ang organ tissues ipailawom sa histo-pathologic examination aron masuta nila kung unsa gyud ang tinuod nga gikamatyan niini lakip na ang pagsusi kung duna kini makamatay nga sakit.

Si NBI medico legal Dr. Rene Cam sa ilang gihimo re-autopsy sa lawas ni Ducayan, duna kini congestion, pulmonary contusion, ug ang pag-collapse sa walang bahin sa baga niini.

Aduna sad silay nakit-ang “traumatic nape injury” sa tangkugo ug may nalisa nga duha ka (C2 ug C3 vertebrate) bukog nga gituohang tungod sa pagliad kaniya. Gawas pa niini, nabun-og usab ang palad, tuong abaga, likod ug dughan sa biktima nga timailhang misukol kini.

Dugang ni NBI agent Bernard dela Cruz, adunay record sa cashier nga nagpakitang adunay gipalit nga Sandugo sandals. Apan wala siya makapresentar sa resibo kay nawani kini, gani giingong mirason pa si Ducayan nga nasuklian  pa siya sa kahera ug ang maong sandals gisulod pa og plastic bag sa maong mall. 

Daku sad ang pasalamat sa inahan ni Ducayan nga si Fe Solidad sa NBI tungod kay gidungog gyud nila ang iyang mga pag-ampo.

Gikatakdang imbestigahon ang lady guard nga si Margie Gazer sa Golden Sun Security Agency; Jeffrey Aquino nga CCTV officer; Boyles Melvin; ug chief security Mauricio Dublados Jr., ang company nurse ug ang plainclothes nga security guard. (BANAT NEWS)