Sakyanan sa Brgy. nabangga 2 patay

CEBU, Philippines - Duha ang patay ug laing lima ang angol lakip na niini kapitan human mibangga ang gisakyan niini nga government-issued nga multicab sa punuan sa kahoy sa provincial road sa sitio Kanotse, Barangay Campo, San Francisco niadtong miaging adlaw.

Gideklarar nga patay nang nadangat sa tambalanan sa Ricardo Maningo District Hospital mao si Maximo Miao ug Renee Nudalo, pulos residente sa sitio Kinyawan, Barangay Campo sa maong lungsod.

Ang mga angol giila nga sila si Western Poblacion barangay captain Donaire Rocacurva, 50;  Gloria Nudalo, 52; ug Wilfredo Fernandez, pulos taga-barangay Southern Poblacion; Ronnie Otida , 34;  Alma Daligdig, 35; ug Julito Daligdig, taga- barangay Campo; ug Alex  Miao Formentera.

Sila si Fernandez ug Formentera nagpabilin sa maong tambalanan samtang ang laing lima gidali  sa pagdala sa Vicente Sotto Memorial Medical Center.

Matud ni Insp. Eduard Sanchez, hepe sa San Francisco Police Station, nga si Rocacurva maoy nagmaneho sa government-issued pick-up type multicab nga adunay plaka nga SJY-777 paingon sa barangay Northern Poblacion.

Ang grupo giingong gikan sa birthday sa usa ka higala diha sa barangay Campo ug gikatahong nakainom si Rocacurva ug kusog nga nagpadagan sa sakyanan dihang kalit kining mi-overtake sa gisundan nga motorsiklo hinungdan nga naglisod na kini pagbawi ug mibangga sa Gemelina nga kahoy.

Wala pay mipatim-aw nga tagtungod sa mga biktima aron sa pagpasaka og tukmang kaso batok ni Rocacurva.  (BANAT NEWS)