Problema sa trapiko sa Escario wa masulbad

CEBU, Philippines - Ang gihimong tulay ug agianan nga nagdugtong sa Singson Village sa Guadalupe paingon sa Sitio Oppra sa Barangay Kalunasan wala makatabang nga masulbad ang problema sa trapiko sa dalan Escario. Ang maong tulay ug karsada gigastohan sa kagamhanan og dul-an sa P50 milyones apan pagka karon nahisama sa nausik lang ang maong salapi kay wala pa hingpit nga mapahimusli ang maong tulay sa mga sakyanan.

Usa sa rason nga wala kaayo’y mga sakyanan nga mogamit niini mao nga walay nakatultol ingon man kadtong nakatultol na dili ganahan nga mobalik tungod sa kabati sa karsada habig sa Guadalupe.

Si Engr. June Nadine Sison sa Department of Engineering and Public Works (DEPW) miingon nga nagkuwang sila karon og aspalto nga magamit sa pagpanindot sa karsada nga  pagka karon naputos sa libaong.

Kun mahuman na ang maong karsada, kadtong gikan sa Banawa o kaha Guadalupe nga mopaingon sa Lahug mahimo na unta nga anha moagi sa Singson Village lahus na sa tulay, tungas sa Sitio Oppra ug ngadto na sa Sitio Sudlon sa Lahug. Si Mayor Michael Rama sayo pa mihatag og kamandoan sa kadagkoan sa DEPW, ilabi na gayud ni Engr. Sison, nga paspasan ang pagpanindot sa karsada aron madasig ang mga motorista sa pag-agi sa maong karsada.

Pagka karon ang mga sakyanan anha maghuot sa Escario alang niadtong mopaingon sa Lahug hinungdan nga dugay kaayo nga makalusot ang mga sakyanan sa maong karsada.

Ang Regional Development Council (RDC) dunay awhag ngadto sa Department of Public Works and Highways (DPWH) nga tun-an nila ang paghimo og laing karsada nga molumbay sa dalan Escario. (BANAT NEWS)