Nagsakay’g biseklita gipusil patay sa nagsakay’g motorsiklo

CEBU, Philippines - Namatay diha-diha  ang  usa  ka lalaki human  kini  pusila sa wala hiilhing kriminal  samtang  nagsakay og  biseklita   sa national road  sa barangay  Poblacion, dakbayan  sa Danao  sa miaging  gabii.  

Ang  biktima  mao  si Reynan Lato Baton, taga-PG Almendras St., barangay  Poblacion, sa  maong  dakbayan. Giulo  pagpusil   ang  biktima  sa  mga kriminal  nga nagsakay  og  motorsiklo  sumala  sa kapolisan.

Sa imbistigasyon  sa kapolisan  nasayran  nga nagsakay  og biseklita ang biktima  paingon  sa ilang  balay  dihang  gisundan  kini  sa usa ka motorsiklo  nga  gisakyan  sa duha  ka  wala  hiilhing  tawo.

Dihang duol  na  ang  distansya  sa motor,  ang  nag-backride  niini  maoy  miluthang  sa ulo  sa biktima.

Nasukarap dayon  kahagbong  sa iyang  gisakyang  biseklita  ang  biktima  samtang  misirit  dayon  pahilayo  sa maong  lugar  ang  mga kriminal.

Daling gidala sa Danao Provincial Hospital   ang biktima apan  ibalhin  unta  kini  sa tambalanan  sa dakbayan  sa Sugbo apan  wala  na  kini  makaabot  sa  tambalanan  nga buhi.  Padayon pa nga nag-imbestigar ang kapolisan   sa maong  hitabo  aron masuta  ang  motibo  niini  ug  pag-ila  usab  sa mga kriminal. (WC)(BANAT NEWS)