Lalaki naghikog sulod sa cabinet

CEBU, Philippines -  Patay nang nakit-an ang 22- anyos nga batan-ong byudo human naghikog kini sulod sa cabinet sa iyang kwarto sa pinuy-anan niini sa Upper Pakigne lungsod sa Minglanilla kagahapon sa alas 7:00 sa buntag.

Usa ka suicide note ang nakaplagan nga gituohang sinuwat sa nagpakamatay nga si Dexter Lim, nagpuyo sa maong lugar.

Matud ni PO2 Vincent Alinabo sa Minglanilla Police Station dihang nahinabi sa Banat News,  ang biktima nakit-an na lang sa kauban sa iyang pamilya nga wala nay panimuot diha sa sulod sa cabinet. Gikatahong duna kini higot nga bakos sa liog ug ang tumoy gibaat sa puthaw nga bitayanan sa mga hanger sa maong cabinet.

Ang iyang kauban sa pamilya nipugos og sulod sa kwarto tungod kay wala na kini motubag pa sa pagsangpit nila.

Wala dayon nila makit-i si Lim sa kwarto apan sa ilang pag-abli sa pultahan sa cabinet didto sa sulod nagbitay na kini.

Daling gi-report sa kapulisan ang maong hitabu ug atol sa pagrespondi sa mga polis naka-recover og suicide note nga dunay nakasuwat nga nangayo og pasaylo sa tanan ug mibasol sa usa ka tawo nga maoy hinungdan sa iyang paghikog.

Matud ni Alinabo gawas sa suicide note nakuha usab nila ang cellphone sa biktima nga dunay daghang mga text messages nga ang usa nakakuha sa atensyon sa kapolisan. Gisuwayan og hatud sa tambalanan si Lim apan patay na kini. (EIM)(BANAT NEWS)