No. 5 most wanted patay

CEBU, Philippines - Human sa pila ka tuig nga pagtago-tago hingpit na gyud nga nakuha sa kapolisan ang ika-limang most wanted nga criminal sa Central Visayas niadtong miaging gabii apan napatay nila kini.

Ang suspetsado nailhan nga si Rodrigo Labitad, molupyo sa sitio Bacawe sa barangay Pamutan ning dakbayan sa Sugbo.

Sa pasiunang imbestigasyon sa kapolisan nasayran nga ang kapolisan pinaagi sa Investigation and Detective Management Branch (IDMB) nakadawat og taho kalabot sa presensya sa suspetsado sa ilang dapit hinungdan sa pagsusi sa mga polis.

Apan giingong pag-abot nila sa maong lugar gikatahong nakabantay ang suspetsado sa kapolisan ug kalit lang gipamusil ang kapolisan, wala hinuoy naigo sa mga polis apan sa pagbawos nila naigo sa dughan ug tuong bahin sa lawas si Labitad.

Nakuha gikan sa mga kamot sa suspetsado mao ang usa ka kalibre .45 nga adunay pito ka buhing bala; lain usab nga kalibre .45 ug laing pito ka buhing bala; laing bala usab sa kalibre .45 ug usa ka granada ang nakuha nga gisulod sa usa ka sudlanan og sigarilyo ug laing jungle bolo.

Gawas pa niini nakuha usab ang mga habak, libretang sinuwat sa Latin ug mga medalyon nga gituohang anting-anting sa suspek.

Ang kapolisan mosikop unta kang Labitad pinasikad sa warrant of arrest  nga giluwatan ni RTC-7 Branch 23 acting presiding Judge Teofilo Buslot niadtong tuig 2010 tungod sa kasong murder.

Ang hepe sa kapolisan IDMB nga si Chief Insp. Bonifacio Garciano mibutyag nga taud-taod na nilang gipangita ang suspetsado.

Gani, niadtong Enero ning tuiga gisuwayan kini pagsikop sa kapolisan apan misukol ug napusilan ug nakaikyas.

Upat ka buwan ang milabay usa ka police asset ang gipatay ug ang gitumbok nga mamumuno gidudahang si Labitad kinsa gihulagway sa kapolisan nga idlas kaayo.

Samtang ang hepe sa kapolisan sa Central Visayas nga si Regional Director Chief Supt. Marcelo Garbo mibutyag nga pasidunggan niya ang mga sakop nga naka-neutralized sa suspek. (/EIM)(BANAT NEWS)