Unang na-rekord nga pagsaka sa Mt. Apo

1880—Ang unang na-rekord nga pagsaka sa kinatumyang bahin sa Mount Apo sa Davao gihimo sa grupo ni Don Joaquin Rajal. Si Rajal mao ang gobernador nga Espanyol sa Davao nianang mga panahona. Una niini, duna nay misuway sa pagsaka sa maong bulkan nga sila si Jose Oyanguren (1852) ug Senyor Real (1870) apan silang duha napakyas. Ang grupo ni Rajal nananghid sa mga nitibong Bagobo aron makasaka sa maong bukid ug dihang natugutan gisugdan nila ang pagsaka Oktubre 6,1880 ug naabot ang kinatumyang bahin niini pagka-Oktubre 10 sa samang tuig. Niadtong Mayo 9,1936 ang Mount Apo nga may gitas-ong 2,954 metros (9,692 ka tiil), gideklarar nga National Park ni Presidente Manuel L. Quezon aron mapanalipdan gikan sa mga illegal loggers ug mangayam og mga sulop nga hayop ang maong bukid apan bisan pa man niini walay puas ang kinawatkawat nga pagpamutol og mga kahoy, kaingin ug pagpanguha sa mga kahayupan sa maong bukid niining mga panahona. Naapil usab kini sa UNESCO World Heritage List aron kini panalipdan sa pagpasipala.

Pagkahimong balaod

sa R.A. 7160

1991—Gilagdaan ni kanhi Presidente Corazon C. Aquino ang R.A. 7160 o ang Local Government Code of the Philippines nga maoy gihimong basehan sa pagpalig-on sa mga lokal nga pangagamhanan sa nagkadaiyang lokalidad sa nasud. Mao usab kini ang basehan sa katukoran sa Department of Interior and Local Government (DILG) nga maoy nagdumala sa mga local governments, kapolisan, bombero ug mga prisohan sa nasud.