Paltik nga natagak miangol sa duha ka babaye

CEBU, Philippines - Duha ka mga dalaga ang naangol dihang aksidenteng mibuto ang paltik nga armas nga aksidenteng natagak sa gawas nga bahin sa complex pagkahuman sa concert disco sa barangay Sta. Cruz sa lungsod sa Balamban atol sa kapistahan sa maong lungsod kagahapon sa alas 4:00 sa kaadlawon. Ang mga biktima mao sila si Michelle Sabalande, 22, nagpuyo sa barangay Prenza ug kapuyo sa iyang ig-agaw nga si Jellyan Galo, 20 , taga A. Lopez dinhi sa dakbayan sa Sugbo. Nadakpan usab ang gitumbok nga tag-iya sa mibutong armas nga si Ecil Onyo, 22, taga sitio Pulo, barangay Baliwagan sa Balamban.

Matud ni PO2 Godofredo Dumdum sa Balamban Police dihang nahinabi sa Banat News pagkahuman sa konsiyerto migawas ang suspek ug pag-abot sa gawas sa gate giingong gikuha niini ang iyang kalibre .38 nga paltik ngadto sa iyang barkada.

Apan dihang iyaha na unta kining iluklok aksidente kining natagak ug nibuto ug nangagi ang duha ka mga biktima nga diha sa duol. Si Sabalande naigo sa walang bahin ubos sa iyang dughan samtang si Galo naigo usab sa walang bahin sa hawak.

Silang duha gidali paghatud sa Balamban District Hospital ug luwas na sa makuyaw nga kahimtang. Nakuha usab gikan sa suspek ang kalibre .38 nga paltik nga dunay tulo ka buhing bala ug usa ka basiyo sud sa tambor niini. (BANAT NEWS)