Karsada gikan Guadalupe lapos Lahug buksan na

CEBU, Philippines - Maiban-ibanan na ang problema sa trapiko diha sa atubangan nga bahin sa Kapitolyo tungod kay sugod ugma buksan na alang sa mga sakyanan ang bag-ong nahuman nga karsada nga nagdugtong sa Barangay Guadalupe ug Kalunasan.

Kadtong mga sakyanan nga gikan sa Guadalupe nga mopaingon sa Lahug o kaha sa ubang kasikbit nga barangay, dili na kinahanglang adto moagi sa M. Velez ug sa karsada atubangan sa Kapitolyo.

Ingon usab niini ang angay’ng himuon niadtong mga sakyanan nga gikan sa Lahug ug gusto nga moadto sa Guadalupe o kaha sitio Banawa ug kanait nga barangay.

Pagkakaron ang mga sakyanan nga gikan sa Lahug ug mopaingon sa Guadalupe kinahanglang mosubay gyud sa Gorordo Avenue, dayon sa dalan Escario agi sa atubangan sa Kapitolyo, liko sa Don Gil Garcia ngadto na sa M. Velez Street.

Kun adto na sila moagi sa laktud nga karsada, kadtong gikan sa JY Square moliko sila sa tuo inig-abot nila sa eskina sa sitio Sudlon ug mosubay paingon sa Beverly Hills.

Sa dili pa sila moabot sa ganghaan (gate) sa Beverly Hills, moliko sila sa wala nga eskina paingon sa Sitio Opra ug inig-abot nila sa gitawag og Obedience Street nga sakop sa Kalunasan, moliko sila sa tuo.

Gikan sa eskina sa Sudlon paingon sa Guadalupe makuha ra og mga 10- minutos ang pagbiyahe sa sakyanan.

Ang pagtiwas sa karsada nga nagdugtong sa duha ka barangay gigastohan kini sa City Hall og P6.3 milyones. Hinuon duna pa’y angayang tagdon sa pag-aspalto sa mga dalan dapit sa Singson Village nga maoy maagian sa mga sakyanan.

Kadtong mga sakyanan nga gikan sa Kalunasan mahimong modiretso sa V. Rama Avenue duol sa Guadalupe Elementary School apan mahimo usab sila nga moliko sa wala subay sa Andres Abellana Street paingon na sa M. Velez Street.

Si Mayor Michael Rama mimando sa kadagkoan sa Department of Engineering and Public Works (DEPW) nga atimanon ang maong bati pa nga karsada dapit sa Singson Village aron madapit ang mga motorista nga anha na moagi sa maong laktud nga karsada. (Rene U. Borromeo) (BANAT NEWS)