Muslim community sa Visayas nasuko sa "Innocence of Muslim" short film

CEBU, Philippines - Gihangyo sa kadagkuan sa Muslim Community sa Kabisay-an nga dili i pasalida dinhi sa nasud ang kontrobersyal nga pelikulang “Innocence of Muslim” diin gihulagway kini nga usa ka anti-Islamic film. Ang Acting Regional Director sa Office of the Muslim affairs sa Kabisay-an nga si Malo Manonggiring mibutyag nga susama sa pagpakaulaw ang gipagawas sa maong pelikula ngadto sa ilang relihiyon ug propeta nga si Mohammad.

Kini makita sa website sa YouTube nga giawhag sa mga Muslim sa tibuok kalibutan nga ipatangtang. Ang maong mubo nga film nakamugna na og grabeng kagubot sa tibuok kalibutan.

Matud pa ni Manonggiring nga unta dili lang ipagawas sa nasud ang maong pelikula kini aron usab mapreserbar ang kalinaw ug kaangayan sa mga Muslim community sa nasud.

Dugang pa niini nga ila nang gipakalma ang ilang kaigsuonang Muslim sa lukop Kabisay-an kini aron usab malikayan ang kagubot. Apan giklaro usab niini nga kun ugaling molugwa sa Pilinas ang maong salida dili na siya makapasalig og kontrolar sa mga ipakita unya nga reaksyon sa mga Muslim sa nasud.

Samtang ang hepe sa kapolisan sa syudad sa Sugbo, Sr. Supt. Melvin Buenafe mibutyag ang kapolisan sa dakbayan sa Sugbo adunay maayong relasyon ngadto sa Muslim community.

Gani, mapasalamaton kaayo si Buenafe ngadto sa mga Muslim tungod sa aktibo niining kooperasyon ngadto kanila kun aduna kini ipahigayong mga kalihukan. “We have good relations with our Muslim community here in Cebu and they are always there to help us in our activities, so ang sa ato pud is to talk with them para malaman natin kung ano yung mga sentiments nila,” pasabot pa ni Buenafe. (Lesley Caminade-Vestil/EIM) (BANATNEWS)