Cortes mihatag mensahe sa magbubuhis
CEBU, Philippines - Ang pagbayad sa hustong buhis ngadto sa kagamhanang lokal sa dakbayan sa Mandaue maoy barometro ug sukaranan sa mga nag-unang proyektong ikabalik sa kagamhanan ngadto sa mga Mandauehanon.
Kini ang unod sa mensahe ni Mandaue City Mayor Jonas Cortes atol sa gipahigayong "Presidencia Awards" night sa top 10 tax payers sa dakbayan sa Mandaue lakip na ang mga personalidad nga nakatabang sa paglambo sa ekonomiya sa maong dakbayan.
Matud pa ni Mayor Cortes nga importante sa usa ka lokal nga kagamhanan ang buhis aron adunay magamit ang siyudad nga ikagasto sa mga kalamboan sa infrastraktura niini ug nag-unang panginahanglanon sa usa ka dapit.
Gumikan niini mapasalamaton si Mayor Cortes ngadto sa mga magbubuhis dili lamang ang mga nag-una nga 10 nga balay patigayon kundi tanang mibubo og negosyo sa dakbayan sa Mandaue ug mibayad og tukmang buhis ngadto sa local nga kagamhanan.
Sa samang higayon si Mandaue City Treasurer Regal Oliva nagkanayon nga ang Diniyos nga pagbayad og buhis sa mga negosyante sa dakbayan sa Mandaue maoy makahatag sa kalamposan sa ilang tinguha pagkab-ot sa P6.4 bilyones nga kinitaan sa siyudad sa umaabot 2016. (BANAT NEWS)
- Latest
- Trending