Gianod gikan sa Mindanao

CEBU, Philippines - Nabangalan sa usa ka mananagat sa Moalboal sa kadagatan sa ilang lungsod ang usa ka mananagat nga taga Zamboanga sa Mindanao nga nagpautaw- utaw na lang sa dagat ug gianod gikan sa Mindanao padulong sa Sugbu sukad pa niadtong Lunes.

Matud pa nga ang maong mananagat napagngan sa iyang makina samtang kini nanagat didto sa ilang lungsod sa Margos sa Tubig sa Zamboanga del Sur ug swerteng naagian sa mananagat nga taga Moalboal alas-8:30 sa buntag niadtong Biyernes. Giila sa kapolisan ang nabangalang mananagat mao si Ronald Bontilao, 20, residente sa maong lungsod sa Mindanao kinsa tataw nga naluya na tungod sa kakulang sa pagkaon ug tubig sulod sa dul-an lima ka adlaw.

Matud ni PO3 Fabio Fernandez sa Moalboal Police Station dihang nahinabi sa Banat News dihang nakita ni Bontilao nga dunay laing mananagat sa iyang nahimutangan gitawag niya kini. Ang mga mananagat gikan sa ilang lugar pagkahibalong nadala sa sulog ug hangin gikan sa Mindanao si Bontilao wala maglangay pagdala kaniya ngadto sa baybayon ug gihatud sa buhatan sa kapulisan.

Sumala pa ni Fernandez si Bontilao namasol   niadtong Lunes sayo sa buntag sa kadagatan sa ilang lungsod apan kalit nga nausab ang lakaw sa panahon ug midagko ang bawod ug mikusog ang huros sa hangin ug nasudlan og tubig ang iyang pumpboat.

Nagdali unta siya paghunong sa pagpamasol og tulingan aron mopauli apan wala na moandar og balik ang iyang pumpboat hangtud nga nadala ang iyang pumpboat sa sulog sa dagat ug sa hangin.

Gitug-an niini sa kapulisan nga sulod sa maong mga adlaw pagpinaabot nga dunay makaaging barko o panagatan kaniya diha sa lawod ang isdang tulingan nga iyang nakuha sa pagpamasol mao ray iyang gikaon.

Kagahapong adlawa miduol si Bontilao sa mga lokal nga opisyal sa maong lungsod aron mangayo og tabang nga makauli siya sa iyang lugar. (/EIM)     - BANAT NEWS