Mga sex worker suportado'g condom

CEBU, Philippines - Padayon   nga nagsuporta og libreng condom ang kagamhanan sa dakbayan sa Sugbo ngadto sa tagkapin sa duha ka libo ka mga commercial sex worker (CSW) dinhi sa dakbayan. Mao kini ang gibutyag ni Dr. Chona Loma ang hepe sa social hygiene clinic sa Cebu City Health Department (CCHD) .

Si Loma mibutyag nga matag tuig makarehistro ang iyang buhatan og 1,800 ngadto sa 2,500 ka CSW nga nagkahulogan sa pagsaka sa   gidaghanon sa mga babaye nga anaa sa maong matang sa panginabuhi matag tuig. Usa sa mga nasuta nga hinungdan niini mao ang kalisod sa panginabuhi ug ang kawalay trabaho matud pa ni Loma.

Hinuon miingon siya nga matag usa ka CSW may schedule sa ilang pagpalimpyo o pagpa-hygiene sa hygiene clinic sa CCHD aron maprotektahan sila gikan sa sakit nga Human Immuno Virus (HIV).

Midugang siya nga dili nila ikabutyag kun pila sa mga CSW ang nataptan niining sakita aron nga dili sila mauwaw sa publiko.

Matud ni Loma nga giprotektahan sa kagamhanan ang ilang ngalan ug dungog ug gani bisan masuta pa sa iyang buhatan nga positibo ang usa ka CSW sa HIV wala nila ipakatap ang maong mga kasayoran ug gipasagdan nila kini makigkuyog sa ilang mga higala.

Hinuon gipaniguro sa taga city health nga kahatagan og tambal ang mga CSW nga masakiton o kaha kun makigdug sa ilang mga customer ila kining gitambagan sa pagpagamit og condom. Giangkon ni Loma nga usa sa mga proteksyon nga ilang gitanyag nga libre ngadto sa mga CSW   mao ang condom.

Napakyas hinuon pagbutyag si Loma kun tagpila ka condom ang ilang ipabawon nga libre sa matag CSW samtang ila kining gisugo nga matag lalaki nga mogamit kanila kinahanglang pagamiton og condom aron kun   ang maong customer may sakit nga HIV dili sila matakdan o kun ang CSW ang masakiton dili usab sila kapanakod.     - BANAT NEWS