CEBU, Philippines - Patay ang usa ka panday ug tulo ang naangol duha niini pulos kritikal ang kahimtang apil na ang 10- anyos nga bata tungod sa panagbangga sa usa ka traysikol ug motorsiklo sa Provincial Road sa sitio Tonggo, barangay Tal-ot lungsod sa Argao niadtong Biyernes sa alas 3:30 sa hapon.
Ang namatay human malagpot ug naugbok ang ulo sa dalan mao si Samuel Parantar,52, nagpuyo sa maong lugar samtang ang naangol mao ang drayber sa traysikol nga si Ibarra Tecson, ug ang magsuon nga nagrabehan luwan sa motorsiklo nga sila si Eric John Sarda,16, ug 10- anyos nga si Kevin Sarda ug ang usa nga wala pa mailhi sa kapolisan nga gituohang nagmaneho sa motorsiklo.
Matud ni PO2 Benjamin Gerozaga, desk officer sa Argao Police Station dihang nahinabi sa Banat News ang traysikol gikan sa bukid ug nagdulhog paingon sa ubos nga bahin samtang nagtungas usab ang motorsiklo.
Sumala pa atol sa panagbangga kusog kaayo ang bunok sa ulan ug dili kaayo maklaro ang dalan. Tungod sa kakusog sa pagbangga ang mga sakay sa traysikol nga walay atop nangalagpot sa taas ug mitugpang nag-una ang mga ulo sa kongkretong dalan.
Sa laing aksidente, talandugon ang kahimtang sa usa ka kawani sa Engineering Department sa lungsod sa Dalaguete human ma- hit and run sa usa ka sakyanan samtang ang biktima luwan sa iyang motorsiklo diha sa barangay Poblacion lungsod sa Dalaguete alas 10:45 niadtong Biyernes sa gabii.
Ang biktima mao si Miguel Lajos, draftsman sa Engineering Department sa munisipyo sa Dalaguete samtang padayon pang gipangita sa kapolisan kinsay nakadasmag ug mibiya kaniya sa ngitngit nga bahin sa maong dapit.
Matud ni PO3 Christopher Requina sa Dalaguete Police Station sa Banat News walay nakakita sa aksidente ug swerteng dunay mga nakaagi sa dapit nga mitabang sa biktima pagdala kaniya sa Alcantara Memorial District Hospital. - BANAT NEWS