Hepe mipaluhod sa reklamante

 CEBU, Philippines - Hepe sa Mabolo Police Station ang gireklamo sa usa ka babaye diha sa buhatan sa Investigation and Detection Management Branch (IDMB) tungod sa giingong pagbastos niini sa reklamante ug wala paghatag kaniya sa iyang igsuon nga nabiktima sa pagsuway ug lugos. Si Fatima (dili tinuod nga ngalan) lumad nga taga Bacolod City ug kasamtangan nga nagpuyo sa Cabancalan syudad sa Mandaue ang midangop sa buhatan ni Supt. Bonifacio Garciano.

Si Fatima uban sa iyang manghod nga 14-anyos ang midangop sa kapolisan aron unta moreklamo nga gisuwayan paglugos sa usa ka lalaki niadtong Biyernes sa gabii diha sa barangay Mabolo ang manghod niini.

Niadtong Lunes, mibalik sila sa police station aron atubangon ang suspek ug si SPO1 Ardilen Palanas maoy migunit sa maong kaso diin giingong gipapili silang magsuon kung pasakaan ba og kaso ang suspek o makig-settle na lang ug pasayluon ang suspek.

Ang 14-anyos gikatahong gitunolan og P70 mil sa tagtungod sa suspetsado isip pahalipay diin ila usab kini nga gidawat aron wala nalay gubot. Gikatahong gitunolan ni Fatima og P3,700 si Palanas nga ‘pang- snacks’ sa mga polis ug mibiya silang magsuon.

Niadtong Martes giingong gipatawag ni Recla si Fatima ug ang 14-anyos diha sa presinto ug sa ilang pag-abot gikatahong giestoryahan sila niini og mga sakit nga pulong .

“Diha ‘tong hepe ug miana nga, Ah..ulawa nimo ah. Imo gibaligya imong manghod, wala gyud nagtingogtingog si ate --- naminaw ra siya sa estorya,” matud pa sa 14-anyos.

Gikatahong nasukosi Recla nga gi-settle ang kaso ug miinsister nga kasohan ang suspek ug mibahad kining si Fatima maoy pasakaan sa kapolisan og kaso.

Midugang ang mga reklamante nga gikuha ni Recla ang nahibiling P45 mil ug ang cellphone ni Fatima ug ubang personal nilang butang ug dihang nakakita kini og picture nilang magsuon nga pulos nag-two piece gisaway kini sa maong opisyal.

Sumala pa sa 14-anyos nga gimandoan pa ni Recla ang maguwang nga paludhon ug papangayuon og pasaylo ngadto sa 14-anyos maong nakahilak ang maguwang.

Apan si Recla dihang gikuhaan og pamahayag bahin sa alegasyon kaniya gihimakak niini ang pasangil. Duna silay gihimong imbestigasyon kung unsay kasong mapasaka batok kang Fatima kinsa midawat sa maong kwarta bugti nga di kasohan ang misuway og lugos sa manghod niini.

Mipasabot usab si Recla nga ang kwarta nga ilang nakuha ila kining ibutang sa account sa 14-anyos tungod kay adto man gyud kini sa bata.

Samtang imbestigahon usab ang imbestigador nga si Palanas tungod sa alegasyong midawat kini sa ‘pang-snacks’ gikan sa magsuon ug kung duna ba kini papel nganong na-settle ang maong kaso. Laing imbestigahon mao ang jailer nga si SPO3 Larry Mausisa ug desk officer SPO1 Jeffrey Marubis.

Ang 14-anyos miinsister nga wala siya ibaligya sa maguwang ug iyang kabubut-on nga mahusay na lang ang kaso tungod sa kalooy ngadto sa inahan sa suspek.

Samtang si Bonifacio mibutyag usab nga mihimo sila ug ilang imbestigasyon sa maong insidenti kini aron gayud masayran nila ang kamatuoran.  (BANAT NEWS)