Kano giilad og kaping tunga sa milyon sa uyab

CEBU, Philippines - Usa ka 63 anyos nga Amerikano kinsa mireklamo nga gihukhokan siya og kaping tunga sa milyon ka pesos sa usa ka babayeng Surigaonon mihangyo sa kapolisan nga ipasikop ang suspetsado aron kasilotan kini sa iyang pagkamangingilad.

Si Richard, 63, nagdumili sa pagbutyag sa iyang apelyido, usa ka American national nga taga Hawii ug temporaryong nagpuyo sa sitio Banawa, barangay Guadalupe ning dakbayan sa Sugbo miila sa babayeng miilad kaniya nga si Mary, kansang apelyido gipugngan sa Banat News, 29, nga taga Bislig, Surigado del Sur apan temporaryong nagpuyo sa barangay Lahug, ning dakbayan sa Sugbo.

Matud pa ni Richard nga human niya makaila pinaagi sa website sa Internet ang suspetsado, nakapadala siya og salapi nga nagkantidad P561,924 sulod sa 60 ka higayon niini samtang didto siya sa Hawaii.

Gidata-data niya pagpadala ang maong kuwarta tungod sa pasalig kuno sa suspetsado nga ipaayo ang balay niini, unya namuhi og baboy ug nagpatukod kuno kini og boutique, matud pa sa asoy ni Richard ngadto sa buhatan sa Theft and Robbery Section (TRS) sa kapolisan ning dakbayan sa Sugbo kagahapon sa buntag.

Midugang ang maong langyaw nga human sa siyam ka buwan nilang pagka-uyab pinaagi lang sa internet, nakadesisyon siya nga makigkita sa suspetsado sa Manila ug didto niya mamatikdi nga kuwang kaayo kini sa pagtagad kaniya.

Miduaw siya sa balay niini sa Lahug sa miaging semana ug didto niya masuta nga pobre kaayo ang suspek, dili tinuod nga may gipaayo kining balay, walay mga baboy nga binuhi ug labaw sa tanan wala’y gitukod nga boutique.

Maoy hinungdan nga iya kining gibiyaan ug mihangyo sa kapolisan nga masikop ang maong babaye ug makuha niya ang bulawang singsing nga iyang gihatag niini ug ang motorsiklo nga gidata-datahan sa suspek.

Sa pagkakaron gipangita pa sa kapolisan ang suspetsado aron masuta kun tinuod ba ang pasangil kaniya. (BANAT NEWS)