Sr. Sto. Niño gigamit palusot og drugas

CEBU, Philippines - Dili gyud maayong tiawan ang relihiyosong mga butang sama sa nahitabo sa usa ka ginang nga gidemalas human kini masakping misuway og palusot og ginadiling drugas diha sa Cebu City Jail sa barangay Kalunasan kagahapon sa alas-11 sa buntag.

Hasta ang imahen sa Balaang Bata nga si Señor Sto. Niño maoy gikatahong gigamit sa maong babaye aron taguon ang kontrabandong iyang gidala pasulod sa maong prisuhan.

Si Rebecca Areglo, 44, nga taga barangay Ermita ning dakbayan miangkong iyang gidala ang shabu human ang iyang kapuyong si Pepito Maluya misugo kaniya nga magdala niini atol unya sa iyang pagbisita sa maong bilanggoan.

Si JO1 Gretchen Rames maoy nakadiskubre sa ilegal nga drugas, miingon nga ang suspek miboluntaryo pang nagparekisa sa iyang kaugalingon ngadto sa female searching area.

Samtang girekisa nahikapan ni Rames ang gamay nga imahen sa Balaang Bata nga si Señor Sto. Niño diha sa bulsa ni Areglo. Dihang gisusi og maayo ni Rames ang kapa sa imahen nakit-an ngadto ang gipapilit nga usa ka pakete nga may sulod nga gidudahang shabu.

Tungod sa pagkadiskubre sa drugas makasohan si Areglo og kasong kalapasan sa Akta Republika 9165.        

Si Areglo nga mibisita unta sa iyang kapuyong si Maluya kinsa nabilanggo niadtong Disyembre sa miaging tuig tungod sa kasong physical injuries mabilanggo usab sa women’s dormitory sa maong bilanggoan.

Sa interbyu kang Areglo sa mga tigbalita mipasangil kining gihadlok siya ni Maluya aron mapugos siya pagdala og shabu ini’g bisita niya sa bilanggoan. Matud pa niini tuk-on siya ug sumbagon niini kung di siya magdala og shabu.

Ang duha duna nay duha ka mga anak. (/EIM) (BANATNEWS)