Kuwarta ug motor gisakiyo sa tulisan

CEBU, Philippines -  Kuwarta ug motorsiklo gisakiyo sa mga tulisan gikan sa usa ka kolektor sa kompaniya sa lending didto sa barangay Don G. Antigua, lungsod sa Borbon sa miaging hapon.

Ang biktima nailhan nga si Carlo Ayunting, hingkod, kolektor sa C and L Lending Company ug lumad nga taga barangay Calamba syudad sa Guihulngan, Negros Oriental.

Si SPO1 Edgar Novabos sa Borbon Police Station mibutyag sa Banat News nga ang biktima midangop sa ilang buhatan ug misumbong nga siya gitulis sa duha ka armadong tawo nga nagsakay og motorsiklo.

Matud pa ni Novabos nga base sa asoy sa biktima nga nangolekta kini sa ilang mga suki sa Don G. Antigua ug dihang misakay na siya sa iyang motorsiklo ug nakadagan na sa unahan, kalit lamang siyang gibabagan sa motorsiklo nga gisakyan sa duha ka wala hiilhing lalaki uban sa pagtion og armas de fuego kaniya ug mipahibawo nga tulis.

Tungod sa kahadlok sa biktima dali kaayo niyang gihatag ang iyang kinolekta nga P4 mil, apan gikuha sa mga tulisan ang iyang cell phone ug ang iyang   XRM nga motorsiklo nga adunay plakang YD8516.

Human niini dali kaayong nakasibat ang mga tulisan pahilayo sa maong lugar.

Matud pa ni Novabos nga karon palang tuiga mibalik ang susamang modus sa mga tulisan sa ilang lugar.

Midugang si Novabos nga ang ilang kapolisan mihimo na og imbestigasyon sa maong hitabo samtang gipaabot usab nila nga adunay mopatim-aw nga mga saksi aron motumbok sa hulagway sa mga tulisan. (BANATNEWS)