Naghikog sa prisohan

CEBU, Philippines - Tungod sa kahadlok nga tinud-on siya og kiha sa ginang nga iyang gitulis usa ka dinakpan ang naghikog sulod sa karsel sa kapulisan sa lungsod sa Aloguinsan niadtong miaging buntag sa alas 5:00 ang takna.

Ang nagpakamatay unang nagpailang siya mao si Rey Villarta Gonzales apan nasuta nga nangalyas lang kini tungod kay ang iyang tinuod nga pangalan mao si Renante Villarta Riza taga Tabunok siyudad sa Talisay.

Kini human gikompirmar sa iyang kapuyo nga si Catharine Rosales Misa.

Matud ni PO3 Eugene Macapas sa Aloguinsan Police Station dihang nahinabi sa Banat News nakit-an nalang sa jailguard nga nagbitay sulod sa selda nga dunay higot nga habol gilubid porma og pisi nga gihigot sa liog niini ug ang pikas tumoy gibaat sa kisame.

Nasayran nga duha lang ka piniriso apil na ang biktima ang nabalhug sa karsel sa Aloguinsan Police atol sa hitabo apan wala usab motug-an dayun ang laing piniriso.

Matud ni Macapas nga si Riza nadakpan ni atol sa hot pursuit operation niadtong Biyernes petsa 30 sa Disyembre human niini gitulis si Ma. Victoria Dela Cerna, ug gikuhaan P6 mil nga cash ug alahas sa biktima.

Apan nasikop kini sa hot pursuit operation sa kapulisan hinungdan nga kini nabilanggo.

Gituohan sa kapulisan nga naguol ang maong piniriso human niini mahibaw-ing desidido gyud nga mopasaka og kaso ang biktima bisan paman ug na-recover ang alahas ug ang kwarta hinungdan nga naguol.

Dugang ni Macapas nga ikaduhang higayun na ang maong paghikog sa maong piniriso sanglit atol sa pagkasikop niini misuway kini og hikog apan ilaha kining napugngan.

Dugang nahipos nga inpormasyon sa kapulisan ang maong piniriso duna usa’y nag-ungot nga warrant sa kasong robbery sa siyudad sa Naga.(/EIM)(BANAT NEWS)