Suplay sa shabu gikan sa City Jail

CEBU, Philippines - Usa ka lalaki nga gipasanginlang bigtime drug pusher ang nadakpan sa buybust operation sa mga sakop sa Provincial Intelligence Branch (PIB) sa miaging hapon ug mibutyag nga gikan sa Cebu City Jail ang suplay sa shabu nga iyang gibaligya.

Ang suspek giilang si Sawaib Magondacan Sultan, 28, alyas ‘Kokey’ lumad nga taga Marawi City apan walo na ka tuig nagpuyo sa sitio Ibabao sa barangay Mohon sa dakbayan sa Talisay kinsa nag-sideline og negosyo og pirated DVD’s.

Ang buybust gipangulohan ni Sr. Insp. Mark Gifter Suvalit, luyo-luyong hepe sa PIB human sila makadawat og impormasyong gawas sa pagpamaligya og pirated DVD namaligya sad og shabu ang suspek.

Matud pa nga idlas ang suspek ug makaduha kini mag-usab sa lugar diin sila magkita sa poseur buyer, una sa Consolacion ug mibalhin sa maong department store nianang pagkahapon diin siya madakpi.

Mitimbang ang shabu og 25 gramos nga lima ka bulto nga nagkantidad og P150 mil sa street value niini.

Si Sr. Supt. Patrocinio Comendador, hepe sa kapulisan sa probinsya sa Sugbu mibutyag sa mga tigbalita nga bigtime drug pusher ang suspek ug sa Consolacion ug mga kasikbit nga lungsod ug siyudad ang operasyon niini.

Si Sultan dihang gipangutana sa mga tigbalita miingon nga kaduha pa siya gisugo sa tawong wala niya mailhi ug kada transaksyon hatagan lang siya og usa ka libo ka pesos.

Matud ni Comendador nga si Sultan mitug-an nga ang maong shabu gikan sa Cebu City Jail (CCJ) diin usa ka binilanggo ang nagpadagan sa maong matang sa ilegal nga negosyo.

“We have identified some but ang uban di lang nato idetalye according to his (Sultan) revelation nga didto gikan ang shabu sud sa maong bilanggoan, naay mo-manage, naa say mo-pick up sa gawas,” dugang pa ni Comendador kinsa miingon nga dakong sindikato ang gibutyag ni Sultan.

Si PO3 Reynaldo Solante sakop sa PIB mibutyag sa Banat News nga ang uyoan ni Sultan nabilanggo sa City Jail ug maoy gidudahan nilang tinubdan niini sa shabu. Giingong ang transaksyon ipaagi lang sa cellphone sa ig-agaw usab ni Sultan nga anaa sa gawas kinsa mo-text sa uyoan niini sulod (CCJ) kun dunay order nga shabu una pa ipagawas ang ‘butang’ diha sa maong bilanggoan.

Apan si Insp. Manuel Dela Peña, deputy jail warden sa Cebu City Jail nga nahinabi sa telepono sa Banat News hugot nga nanghimakak nga dunay binilanggong nagnegosyo og shabu.

Gani iyang gitataw nga higpit kaayo ang ilang seguridad sulod ug niadtong modalaw sa mga piniriso.

“Ngano diri na gikan ang shabu? Nga wa may laboratory diri sulod,” asoy pa niya.

Siya midugang nga niadtong Lunes sa alas-9 sa gabii milusad sila og operation greyhound sa tanang mga inmates sa City Jail nga kaupat nila buhaton matag buwan apan ang ilang nakuha mga lighter, lata nga gihait para ihiwa sa mga lamas.

Apan iyang giangkon taud-taod nang duna silay ma-intercept nga tin foils sulod sa bilanggoan apan karung bag-o wala na silay nakuha.

Nagtuo si Dela Peña nga buot lang dauton ang ilang bilanggoan ug ang naghimo niini kanhi piniriso sa Cebu City Jail tungod sa ilang ka-istrikto sa seguridad sulod sa bilanggoan ug mga mobisita ilaha man kining rikisahon og maayo.

Apan bisan paman niini, gipasalig ni Dela Peña nga mohimo sila’g linain nga imbestigasyon ug andam silang makig-alayon sa Cebu Provincial Police Office (CPPO) nga mohimo’g dugang pakisusi labot sa gitug-an ni Sultan.

Ang lima ka bultong shabung ebidensya giduso dayon sa kapulisan ngadto sa PNP Crime Laboratory alang sa dugang eksaminasyon.

Si Sultan kasamtangan karung gitanggong sa usa sa mga police station dinhi sa lalawigan ug gipaabot nga pasakaan siya og tukmang kaso sa provincial prosecutors office.(/EIM)(BANAT NEWS)