Vendors ug drayber sa Talisay nag-rally

CEBU, Philippines - Mga vendors ug mga drayber sa dakbayan sa Talisay nag-rally atubangan sa city hall nga nanawagan kang Mayor Socrates Fernandez nga ibalik sila ngadto sa daang merkado publiko sa Tabunok.

Ang rally natigayon usab atol nga gituki sa konseho ang gisumitir nga resolusyon ni Konsehal Val Ylanan niadtong milabay’ng semana nga nag-awhag nga temporaryong buksan sa kanhi terminal sa Tabunok. Si Ylanan kinsa ubos sa landong sa oposisyon nga nahinabi sa mga tigbalita kagahapon nagkanayon nga samtang unta wala pa gamita ang kanhi terminal sa Tabunok temporaryo lang unta kining buksan aron ang mga drayber sa traysikol dili makahatag og kasamok sa trapiko diha sa Tabunok.

“Kini silang tanan mga drayber ug mga manindahay dili mga “KSP” o kulang sa pansin but they need to speak out to the extent of being redundant because the situation now is losing their children education,” matud pa ni Ylanan sa iyang privilege speech kagahapon.

“My fellow Councilors, we can’t just take this sitting down admittedly, there were already lapses since the choice of the place for new public market should have been well-tackled, then the new route of traffic system would already have been in place, gipabalhin nato sila nga wa klaroha ang sistema sa traffic kun naandam pa, kun natun-an pa daan,” dugang pa ni Ylanan.

Ang mga sakop sa oposisyon nakugang nalang kabahin sa naaprobahang committee report nga nagbasura sa resolusyon ni Ylanan tungod sa rason nga aduna nay ordinansa ang siyudad kabahin sa pagpabalhin sa mga vendors ug pagbalhin sa terminal sa tricycle.

Si Konsehal Romeo Villarante sa oposisyon mibutyag nga ang mga vendors ug mga drayber kanunay’ng moduol kaniya ug mopadayag sa ilang problema ug ilang nasiguro base sa ilang pagsusisusi nga tinuod ang ilang gireklamo.

Si Bise Mayor Alan Bucao nagkanayon nga mopadangat siya og suwat ngadto sa mayor kabahin sa hangyo ni Ylanan sa temporaryong pagbukas sa daang terminal. Ang mga vendors nga mitambong kagahapon sa session mi-walkout gikan sa session hall human mapasar ang committee report.

Si Marivic Lasquete, bise presidente sa fish section sa gibalhinang merkado sa Lagtang mibutyag nga daghan nang vendors ang mihunong na sa pagpaninda tungod sa kahinay sa ilang halin sa bag-ong merkado.

Sa laing bahin, si Domingo Dela Rita, drayber sa traysikol nga dunay rotang Lawaan-Linao nagkanayon nga apektado gyud ang ilang kinitaan tungod kay wala nay pasahero silang mahatud sa Lagtang.

Ang siyudad mibutang og terminal sa traysikol sa bag-ong merkado ug niadtong Huwebes sa milabay’ng semana ang Task Force Alpha sa Land Transportation Office (LTO) ug City of Talisay Traffic Operation Development Authority (CT-TODA) nagpahigayon og operasyon batok sa mga traysikol nga nagpundo diha ilawom sa flyover sa Tabunok tungod sa namugna nilang kahuot sa trapiko. (BANAT NEWS)