CEBU, Philippines - Kasong kriminal ug administratiba ang ipasaka batok sa tag-iya ug sa customs broker nga nagdala sa mga chopchop nga armas ug big bike motorcycles dinhi sa Sugbu nga gikumpiskar sa mga sakop sa Enforcement and Security Services (ESS) Customs Police sulod sa Cebu International Port o CIP sa milabay’ng adlaw.
Sa pakighinabi sa Banat News ni Cebu Customs District Collector Atty. Ronnie Silvestre andam na ang warrant of seizure and detention (WSD) kalabot sa maong kargamento.
Matud pa ni Silvestre dakong supak sa balaod sa importasyon sa mga armas ug used motorcycles sama sa ilang nakumpiskar nga gisulod sa usa ka 40-footer van gikan sa nasud sa Estados Unidos.
Gisumiter na ni ESS Customs Police District Commander Major Camilo Casculan Jr. ngadto sa Customs District Legal Division ang kaso batok ni Renato Ramos nga giingong maoy tag-iya sa maong kargamento nga atua pa sa Estados Unidos ug Rafael Rubio kinsa maoy customs broker sa maong mga kargamento.
Matud pa ni Casculan gawas sa sayop nga deklarasyon sa maong kargamento wala usab makakuha og pagtugot gikan sa Philippine National Police si Ramos nga mopalit og armas ug ipadala niini dinhi sa nasud.
Dugang pa ni Casculan nga gidili ang pagdala og “2nd hand o used vehicle” dinhi sa nasud kung walay pagtugot gikan sa Board of Investment Services (BIS) ilabi na nga dili balikbayan si Ramos.
Matud pa ni Silvestre hatagan gihapon nila og higayon si Ramos ug Rubio sa pagpaminaw sa ilang habig kalabot sa maong importasyon diha sa Legal Division una nila kini kasohan ngadto sa korte.
Kahinumduman nga ubay-ubay nga armas de fuego, mga nagkadaiyang bala sa M16, M14, cal. 45 ug cal. 30 lakip ang big bike motorcycles ang nakumpiskar sa sulod sa CIP. (BANATNEWS)