Inahan ug anak gipriso gumikan sa paghilog og puya

CEBU, Philippines - Gibalhog sa prisohan ang usa ka inahan ug anak nga babaye human hiloga ang pito pa ka bulan nga puya nga gisabak sa naulahi, ug gilubong sa kamaisan sa barangay Dunggoan, dakbayan sa Danao.

Ang inahan ug anak nga nagtingkagol na karon sa prisohan mao sila si Rosalita Moniva, 58, minyo ug Norma Romanillas, 29, minyo nga pulos nagpuyo sa maong dapit.

Si SPO2 Ildefonso Prosia sa kapolisan sa maong dakbayan nga nahinabi sa Banat News miingon nga usa ka Lurenda Mates nga silingan sa mga suspetsado maoy unang mitug-an ngadto sa mga sakop sa Barangay Intelligence Network (BIN) sa maong lugar kalabot sa puya nga ilang gilubong.

Matud pa ni SPO2 Prosia nga nakunsensya na si Mates sa kasayoran nga iyang nahibaw-an sa gihimo sa inahan ug anak maoy hinungdan sa pagbutyag niya   niini.

Human mamatud-i ang maong kaso, gidakop dayon sa kapolisan ang inahan ug anak ug gibalhog sa bilanggoan.

Dugang pa niya nga human nila makuha ang maong kasayoran gikan sa uban pa nga mga silingan   ila dayong gipakubkob ang dapit nga giingong gilubngan sa gi-abort nga puya.

Si SPO2 Prosia miingon nga nakawtan nila ang maong puya nga gilubong pipila ka metros nga gilawmon nga giputos og panapton.

Sa ilang pakisusi nga gihimo ilang nasayran nga mopauli niining buwana ang bana ni Romanillas nga nagtrabaho sa abroad.

Nagtuo sila nga gibati og kahadlok ang inahan ni Romanillas nga maabtan sa bana ang iyang anak nga nagsabak og bata nga iya sa laing lalaki maoy hinungdan nga gisuportahan niya kini sa paghilog sa maong puya.   - (BANAT NEWS)