International event himuon dinhi

CEBU, Philippines - Laing international event ang gikatakdang ipahigayon dinhi sa Sugbo sa sunod nga tuig nga pagasalmotan sa mga negosyante sa nasud sa Singapore. Ang maong international event mao ang Cebu on the Edge nga hugot usab nga gisuportahan ni Governor Gwendolyn Garcia human miduol sa gobernadora ang organizer sa maong event nga si Marco Santos.

Sigun pa ni Santos nga ang Cebu On the Edge nagsentro sa culture and creative business nga pagasalmotan sa mga nagkadaiyang negosyante sa tibuok nasud ug ubang mga kanasuran lakip na niini ang taga Singapore.

Si Santos mapasalamaton kaayo sa gobernadora tungod sa suporta niini sanglit ang maong mga kalihokan anhi man ipahigayon sa Sugbo ug gipaabot nga dugang mga turista ang mobisita dinhi sa lalawigan sa Sugbo nga makatabang sa pagsulbong sa ekonomiya sa probinsiya. (BANATNEWS)