Luigi nag-monitor sa flood control project

CEBU, Philippines - Gibutyag ni 6th district Congressman Gabriel Luis Luigi Quisumbing nga ilang gipakigtagboan ang mga opisyales sa 6th district Engineering Office aron iyang mamonitor ang kasigurohan sa pagpatuman sa A.S. Fortuna Drainage/Flood Control Project.

Kini aron mas madali ang paghuman sa maong proyekto nga gisitar sa nasudnong kagamhanan gumikan sa iyang pagpunay og hangyo aron usab mahatagan og kasulbaran ang grabing baha sa siyudad sa Mandaue.

"This perennial flooding has always been a challenge to our constituents and it is among the first concerns that I personally brought to Department of Public Works and Highways (DPWH) Secretary Rogelio Singson", sigun pa ni Quisumbing.

Gipasabot ni Quisumbing nga human makita sa national television nga ang Sugbo maoy usa sa labing bahaanan nga probinsiya sa panahon sa ting-uwan, iya gyud nga gipadangat ang maong suliran ngadto sa DPWH aron mahimo kining prayoridad nga proyekto sa nahisgutang departamento.

Sumala pa ni Quisumbing nga ning panahon sa ting-uwan iyang nakita ang kadako sa panginahanglanon sa flood control facilities nga   ikataod sa labing daling panahon sa A. S. Fortuna ilabina sa atubangan sa Rolling Hills.

Gipahibawo usab ni Quisumbing   nga sa maong proyekto makita unya sa katawhan ang dakong kalambuan ug rehabilitasyon sa Hernan Cortes Road.

Dugang pa niya nga sa iyang pagpakighinabi sa mga opisyales sa DPWH, ang A.S Fortuna-Hernan Cortes flood control project nahatagan na og igong pundo ug ipatuman na sugod karong katapusang kwarter ning tuig 2011.

"We will closely monitor the implementation of this project and be actively involved in finding a genuine solution to the flooding problem in our district,” panapos nga pamahayag ni Quisumbing. (BANATNEWS)