CEBU, Philippines - Kritikal ang kahimtang sa usa ka airport police sa Mactan Cebu International Airport (MCIA) sa dakbayan sa Lapulapu human giingong gikapinusilay ang manag-agaw niyang mga kaubang airport police alas-9 pasado ang takna sa miaging gabii sa sulod sa ilang buhatan sa Security and Safety Services Office nga nahimutang usab sa compound sa maong tugpahanan.
Si SPO4 Gaspar Magdadaro sa kapolisan sa Presinto 5 sa Lapulapu City Police Office (LLCPO) nga nahinabi sa Banat News miila sa biktima nga mao si Police Corporal Esmeraldo Bensi, nagpuyo sa barangay Gun-ob sa maong dakbayan.
Giila usab niya ang manag-agaw nga suspetsado mao sila si Capt. Clarito Alvarez, 50, shift supervisor, taga barangay Pajac sa maong dakbayan ug Pio Alvarez, 48, taga Nivel Hills, barangay Lahug, dakbayan sa Sugbo.
Si Magdadaro miingon nga mitahan ang manag-agaw sa hepe sa Presinto 5 nga si Chief Inspector Conrado Manatad.
Si Clarito sa pasiunang pagsukitsukit mipadayag nga on duty sila sa ilang trabaho isip airport police dihang kalit nahidangat ang biktima nga mireklamo labot sa dili maayong resulta sa performance rating niini.
Gialegar ni Clarito nga daw nakainom si Bensi maong iyaha kining gipakalma ug gikatahong kalit kining mibunot sa dala niining kalibre 45 pistola ug namusil kanila.
Si Clarito daling nakahapa sa sawog ug diha nahitabo ang ilang pinusilay gamit ang iyang .9mm service pistol ug naigo sa buko-buko, liog ug tiyan si Bensi.
Dali nilang gidala sa Mactan Doctors Hospital sa barangay Basak sa maong dakbayan ug padayon kini nga giatiman sa mga doktor sa maong tambalanan atol ning pagsulat sa balita.
Si Magdadaro miingon nga gitahan ni Clarito ang kalibre .9mm nga armas nga giingong gigamit niini sa maong pinusilay ug ingon man usab ang kalibre.45 pistola sa biktima sa maong pagpinusilay. (EIM) (BANATNEWS)