Nagpatay ni Osorio sikop

CEBU, Philippines - Ang giilang usa sa mga gun man nga mipatay kang Cebu City Assistant Prosecutor Patrick Osorio nadakpan didto sa usa ka beauty parlor sa barangay Guba, ning dakbayan sa Sugbo niadtong Martes sa alas 6:00 sa gabii.

Ang suspetsado giilang si Lyndon Horandoy, 28, manupihay, sa nahisgutang beauty parlor nga taga Guba ra usab.

Sa press conference kagahapon sa hapon sa conference room sa Cebu City Police Office (CCPO) si Horandoy gipaatubang sa mga sakop sa media kinsa miangkon nga siya maoy kauban ni Allan Senogat, ang drayber sa habal-habal, ug usa sa mga suspetsadong mipusil patay kang Osorio kinsa nasikop usab sa milabay’ng tuig.

Kahinumdoman nga si Osorio gipusil patay niadtong Enero 6, 2009 sa dalan Maria Gochan, dakbayan sa Sugbo samtang nagpaingon kini sa ilang balay sa Minglanilla.

Ang kapolisan mibutyag nga adunay nakatudlo kanila sa nahimutangan ni Horandoy busa ila dayon kining gipaubos sa surveillance hangtod nga dihang positibo na ang tanan pinaagi sa warrant of arrest nga giluwat ni RTC   Branch 17 Judge Silvestre Maamo Jr ila dayon kining gisikop.

Si Chief Inspector Romeo Santander sa City Intelligence Branch (CIB) sa CCPO mibutyag sa mga tigbalita nga si Horandoy nagbalhin-balhin   og pinuy-anan sa upat ka mga lugar ning lalawigan sa Sugbo ug sa Bohol.

Una giingong didto kini puyo sa Barili, sunod sa sitio Baksan, barangay Sapangdako, silingang barangay sa Guadalupe, dakbayan sa Sugbo, unya didto sa   Ubay, Bohol ug karon sa barangay Guba diin siya masikop.

Si Santander nagkanayon nga ang mga suspetsado pulos mga gun for hire ug gani aduna na kini record sa ilang buhatan ug giingong gikontrata kini og P50 mil bugti sa pagpatay kang Osorio.

Gibutyag usab ni Horandoy ngadto sa kapolisan nga P5 mil ray gihatag ni Senogat kaniya nga bahin gikan sa P50 mil nga bayad.

Matud ni Santander nga si Horandoy nangangkon nga aduna siya’y paryente nga usa usab ka gun for hire.

Si Santander miingon nga may kalambigitan sa trabaho ang hinungdan sa pagpatay kang Osorio ug ang ilang gipangita karon mao nalang ang mastermind nga misuhol sa maong mga killer.

Samtang gikalipay kaayo ni Regional State Prosecutor Fernando Gubalane   ang pagkasikop ni Horandoy.

Gani iyang gi-congratulate sila si Santander ug si Sr. Supt. Melvin Buenafe,   ang hepe sa kapolisan sa dakbayan sa Sugbo gumikan sa maong kalampusan nga ilang nahimo.

Gipanghinaot niya nga anha na unta ning tungora masayran na   ang utok sa pagpatay kang Osorio aron hingpit nang kahatagan og hustisya ang kamatayon sa anhing city assistant prosecutor   ug ang nagbangutang pamilya niini. (BANAT)