Tabunok market gipistahan sa kawatan

CEBU, Philippines - Gisugdan na og pagpangawat sa wala mailhing mga tawo ang bag-ohay lang gipasirad-ang merkado sa Tabunok, dakbayan sa Talisay samtang adunay mga nagmagahing vendors sa pagbalhin sa bag-ong merkado ang nangabiktima sa pagpanglungkab.

Sumala pa nga lakip sa mga gihinay-hinayan og pangpangawat mao ang mga atop nga sin, kabilya ug mga kahoy sa mga kanhi stalls kini bisan paman gikural na ang maong merkado sukad niadtong Lunes sa kaadlawon.

Kagahapon makita nga sama sa giagian og bagyo ang kanhi merkado publiko sa Tabunok diin dunay mga mamasurahay, kargador ang nag-iyahay og hakot sa mga puthaw, bronse ug uban pa nga ilang mapuslan.

Si Cora Carlos, presidente sa dry goods section mipasangil nga wala tagda sa mga polis ang ilang reklamo nga gilungkab ang ilang mga stalls ug gipangawat ang ilang baligya. Giputlan na usab sila og kuryente ug tubig.

Ang siyudad daan nang mibahad nga sa adlaw sa pagsirado sa karaang merkado putlan kini sa kuryente ug tubig ug koralon ang palibot niini.

Si Sherwin Echavez ang bise presidente sa dry goods section nagkanayon nga ang gibuhat sa gobiyerno usa ka pagpakauwaw kanila.

Nasagmuyo usab sila tungod kay wala pay demolition order apan gitugotan nang makasulod ang mga basurero nga nanghakot sa mga puthaw, sin, kabilya, mga kahoy ug uban pa.

Sa laing bahin, si Supt. Eddie Recamara, officer-in-charge sa Talisay City Police Station nagkanayon nga duna siya’y gidestinong mga polis diha sa karaang merkado ug ilang imbestigahon ang alegasyong pagpangawat.

Aduna hinuoy pagduda ang hepe nga estratehiya kini sa mga vendors aron mogawas nga silang mga polis walay gihimo aron sila panalipdan.

Si Carlos nagkanayon nga posibleng mopahigayon sila og tigom kabahin sa legal nga lakang nga ilang buhaton batok sa kapolisan ug mga opisyal sa siyudad. (BANAT NEWS)