Nawad-a'g trabaho naghikog

CEBU, Philippines - Usa ka 21-anyos nga lalaki   kinsa nalumsan sa kaguol tungod kay nawad-an og trabaho   naghikog   sulod sa ilang balay sa barangay Upper Poblacion , sa lungsod sa Aloguinsan sa miaging hapon.

Ang naghikog giila sa kapolisan nga mao si Lyndon John Tengue Manigos, 21,   nga nagpuyo sa maong lugar.

Dihang gisusi sa kapolisan ilang nasayran kang Rizalinda, inahan ni Manigos   nga niadtong Lunes sa udto daan na siyang nabalaka kay wala maniudto ang iyang anak ug didto ra kini sulod sa lawak sa ilang balay.

Nianang pagka-alas 3:00 sa hapon misamot na ang iyang kabalaka busa misil-ing siya sa lawak niini ug mao nalay kahikurat niya dihang   maoy misugat sa iyang panan-aw nga nagbitay na kini   pinaagi sa pisi nga gihikot sa iyang liog ug gigaid ang pikas tumoy sa ilang sagbayan.

Dugang nasayran sa kapolisan nga si Manigos   giingong misugilon sa iyang mga higala nga gikaguol niini nga nawad-an siya og trabaho hinungdan nga   nabuwag kaniya ang iyang anak.

Samtang sa laing bahin usa ka 42 anyos   nga nag-antos sa sakit nga nerbiyos wala na kaagwanta sa iyang sakit naghikog usab pinaagi sa paggamit og pisi sa kanding didto sa sitio Opao, barangay Sta. Felomina lungsod sa Alegria sa miaging buntag.

Ang nagpakamatay mao si Abelino Lendio, 42, molupyo sa sitio Law-ang barangay Valencia sa lungsod sa Alegria.

Si SPO4 Rutillo Cardona sa Alegria Police mibutyag sa Banat News nga si Cerelo Lendio ang amahan ni Abelino misugilon kanila nga duha na ka higayon nga misuway sa pagpakamatay ang iyang anak apan napugngan kaniadto.

Apan kining ikatulong higayon nananghid kini nga molakaw niadtong Sabado sa gabii kay moadto sa ilang payag sa umahan apan pagkabuntag nadiskobrehan nila nga patay na kini nga nagbitay pinaagi sa pisi nga hikot sa kanding nga maoy gihikot sa iyang liog ug gigaid sa sagbayan sa payag. - Ug Darrel A. Carumba/WC (BANAT NEWS)