Kapin 4 mil ka punoang marijuana gilarot

CEBU, Philippines - Nadiskubrehan sa kasundalohan ang dakong plantasyon sa marijuana sa barangay Langusig sa dakbayan sa Danao nga mokabat sa 2,080 ka fully grown ug 2, 111 ka semilya nga ilang gipang-ibot alas-5 pasado ang takna kagahapon sa buntag.

Si SPO3 Bryan Batiquin sa kapolisan sa maong dakbayan nga nahinabi sa Banat News miingon nga ang maong plantasyon sa marijuana nga nadiskubrehan nahimutang duol sa panimalay nga gipanag-iya ni Abner Batoon kinsa wala diha atol sa pagkadiskubre niini.

Matud pa ni Batiquin nga dili unta kini ang target sa grupo sa 78th IB sa Philippine Army nga gipangulohan ni 1st Lt. Aladin Almendras ug sa team sa 52nd IB nga gipangulohan ni 1st Lt Lorenzo Siobao.

Ang ilang giadto sa maong dapit mao ang pagdakop kang Ronald Batican kinsa nag-atubang og kasong murder ug may warrant of arrest gikan ni Judge Edito Enemesio sa RTC 7 sa Branch 55 nga nagbase sa dakbayan sa Danao.

Napakyas sila si 1st Lt. Almendras sa pagdakop kang Batican sanglit wala kini diha sa panimalay niini apan sa ilang pagpamauli ilang naagian ang maong plantasyon hinungdan nga ilaha kining gipang-ibot.

Gisusi karon nila kun may kalambigitan ni Abner Batoon sa maong plantasyon sanglit duol kini sa ilang balay. (EIM)  (BANATNEWS)