CEBU, Philippines - Gihatagan og 60 ka adlaw sa kagamhanan sa dakbayan sa Mandaue ang tagdumala sa Jadewell Parking System Corporation alang sa pagtubag sa gipadala nilang pahibalo alang sa hingpit na nga pagpahunong sa ilang operasyon.
Ang pagpahunong sa operasyon sa Jadewell Parking System Corporation natigayon human ang city legal sa Mandaue mirekomendar kang Mayor Jonas Cortes og rescission sa kontrata sa maong kompaniya ngadto sa kagamhanan sa maong dakbayan nga maoy gitahasan sa pagdakop sa mga sakyanan nga nakahimo og kalapasan sa kadalanan.
Si Atty. Giovanni Tianero mirekomendar sa rescission tungod sa kadaghan sa nahimong kalapasan sa Jadewell nga gihulagway nilang wala mosunod sa kontrata.
Naglakip sa mga kalapasan mao ang kapakyasan sa maong kompaniya sa pagbutang og performance bond nga nagkantidad og P500,000 ug ingon man mga electronic parking meters sa kadalanan.
Pakyas usab ang maong kompaniya sa pagsubasta sa mga na-impound nga mga sakyanan nga lapas na sa unom ka bulang wala lukata maong alkanse na ang dakbayan niini.
Si Rogelio Lim nga maoy presidente sa Jadewell Parking System Corporation nga nahinabi sa Banat News miingon nga ilahang gilihok ang ilang kaakohan ug ilahang tubagon ang mga pasangil sa tukmang panahon. (Romeo T. Limpangog/EIM) (BANAT)