Landslide Sa Alegria

CEBU, Philippines - Paralisado ang transportasyon sa bukirang bahin sa lungsod sa Alegria ilabi na paingon sa sikbit nga barangay sa Nug-as sakop sa lungsod sa Alcoy tungod sa nahitabong landslide sa barangay Lipantonga utlanan sa lungsod sa Alegria dihang natabunan ang barangay road niadtong Domingo sa alas 4:00 sa hapon.

Ang municipal engineer nga si Joseph Peras nga maoy misusi sa nahunlak nga lugar mibanabanang upat ngadto sa lima ka tiil ang gitas-on sa nahunlak nga yuta gikan sa ibabaw nga bahin nga mitabon sa tibuok karsada sa barangay.

Matud ni PO1 Jonathan Calabroso, desk officer sa Alegria Police dihang nahinabi sa Banat News hangtud kagahapong adlawa pabiling dili kaagian sa mga sakyanan bisan mga motorsiklo apan padayun na kining gihawanan sa mga kawani sa lungsod ug barangay.

Walay gika-report nga naangol o nakalas atol sa hitabo nga giingong epekto sa pag-uwan-uwan niadtong milabay’ng semana nga hinungaw sa bagyong Juaning nga nikuso- kuso sa Luzon area apan nakamugna og mga pag-uwan dinhi sa Sugbo.

Ang maong lugar maoy agianan sa mga sakyanan paingon sa barangay Nug-as lungsod sa Alcoy nga naila na nga komprahanan sa mga produktong utanon.  - BANAT NEWS