Lalaking gitipi sa Pardo wa ilhi

CEBU, Philippines - Wala pa hiilhi sa kapolisan ang usa ka lalaki nga napalgang patay nga may daghang samad pinusilan sa daplin sa dalan duol sa Sunrise Village sa Poblacion Pardo siyudad sa Sugbo kagahapon sa alas-2:00 sa kaadlawon.

Ang biktima gibana-banang nagpangidaron og 20 anyos pataas, yapison og lawas, nagsul-ob og brown sweat shirt, green short ug yellow nga tsinilas.

Tulo ka mga wala hiilhing lalaki nga maoy responsabli sa pagpatay sa biktima gituohang mga drayber sa traysikad nga nagbiyahian sa maong lugar diin usa kanila gihulagway nga taas og buhok ug adunay tattoo sa buko-buko niini.

Duha ka mga saksi nakuhaan og pamahayag nila ni PO3 Victor Ruel Ayuman, PO3 Geoffrey Gutual, PO2 Julius Regis ug PO2 Cristobal Geronimo sa Homicide Section sa Cebu City Police Office (CCPO).

Si Julito Pua, coach sa baskeball sa maong lugar mitug-an sa kapolisan nga nagsakay siya sa multicab uban sa iyang mga player nga gimaneho ni Kagawad Edelio Abellanosa padulong sa ilang pinuy-anan dihang pagsulod nila sa Sunrise Village kalit lang napawong ang makina sa multicab busa giduot nalang kini sa mga player.

Apan nakairog ang multicab og pipila ka metros maoy nakita nila ang nagbuy-od nga lawas sa tawo daplin sa karsada.

Ila dayong gitawgan ang kapolisan sa Pardo ug si PO3 Fabius Belleza uban sa mga tanod   nga gipangulohan ni Kagawad Abellanosa maoy miresponde.

Ang mga sakop sa Crime Scene Investigation Unit (CSIU) nga gipangulohan ni Fredilson Codilla maoy misuta nga nabulit sa mga samad pinusilan ang lawas sa biktima may lakra ang liog niini agi sa hikot ug may mga bun-og sa iyang agtang.

Si Raymund Castañares, taga sitio Paglaom sa barangay Bulacao, dakbayan sa Sugbo miasoy sa kapolisan nga ala 1:00 kagahapon sa kaadlawon iyang nakit-an ang biktima nga gigukod sa tulo ka mga tawo, unya nabati niya ang singgit niini nga nangayo og panabang, dayon nahilom unya gisulod og sako.

Nasayran nga ang Sunrise Village nabaniog nga pinuy-anan sa mga “Sako Boys”. (BANAT NEWS)