Ouano uyon nga mapalit ang 6.5 ektaryang luna

CEBU, Philippines -  Si kanhi Mandaue City Mayor Alfredo “Pedong” Ouano mipadayag sa iyang suporta kabahin sa tinguha sa kagamhanan sa dakbayan sa Mandaue nga pagpalit sa mokabat 6.5 ka ektaryang luna diha sa barangay Paknaan sa maong siyudad nga magsilbing relocation site sa mga kabus nga molupyo nga mahiklin gikan sa daplin sa sapa ug uban pang danger zone area.

Matud ni kanhi Mayor Ouano nga dili maalkansi ang gobiyerno kun paliton ang maong luna sanglit makapabor man niini ang kagamhanan sa dakbayan tungod kay barato man kaayo ang pagbaligya niini.

Gitataw niya nga lisud na kaayo alang sa usa ka lokal nga gobiyerno sa pagpangita og dakung luna nga magsilbing relocation site sa mokabat 2,000 ka mga kabus nga molupyo sa siyudad.

Sa nasayran nga gihimo na sa kagamhanan sa siyudad ang preliminary assessment and locational clearance (PALCE) sa maong luna nga nahimutang duol sa Cansaga Bridge sa barangay Paknaan.

Mokabat sa P2,000 ang matag metro kuwadrado ang pagpalit sa maong luna nga ang pasiunang bayad gikan sa panudlanan sa kagamhanan sa dakbayan.

 Si Mayor Jonas Cortes miingon sa gitinguha niyang programa ang CMP maoy motiwas sa pagbayad sa tag-iya sa maong luna nga si Dinnes Lua.

Ang matag molupyo hatagan og 33 metro kuwadrado diin pagabayran nila kini sulod sa 25 ka tuig nga gidugayon ngadto sa gobiyerno.

Nunot niini si Emmanuel Arong nga maoy pangulo sa Housing Urban Development Office (HUDO) sa dakbayan miingon nga giumol na sa mayor ang technical working group nga maoy gitahasan sa pag-andam sa mga gikinahanglan sa kaugmaran sa maong luna sama sa pag-abuno, paghimo sa plano sama sa pagbutang og mga dalan, pagbutang og mga kanal ug pagtukod sa mga balay, pagtaud og linya sa tubig ug kuryente niini.(BDB) (BANAT NEWS)