Ouano midepensa ni Quisumbing

CEBU, Philippines -  Di mosaler ang pagpamugos ni kanhi Mayor Alfredo Pedong Ouano kang Kongresista Gabriel Luis Quisumbing nga panlimbasogan niining mahimong lone congressional district ang dakbayan sa Mandaue.

Kini tungod kay may probisyon sa Batakang Balaod nga nagdili paghimong lone district sa maong dakbayan gumikan sa Cordova ug Consolacion nga pabiling nakakabit sa Mandaue sa ikaunom nga distrito, sumala ni provincial board member Thadeo Ouano, anak ni Pedong Ouano.

Si board member Ouano kinsa nahimo usab nga mayor sa dakbayan sa Mandaue nga maoy gipulihan ni Mayor Jonas Cortes, midepensa kang Quisumbing dihang gihulga kini ni kanhi mayor Pedong nga mag-atubang kuno sa dakong risgo ang politikanhong posisyon ni Quisumbing gawas kun molampos kini sa pagpa-lone district sa Mandaue.

Si board member Ouano nagkanayon nga bisan mag-unsa pa og hiwasa didto sa hawanan sa Kongreso si Quisumbing, wala gyud kini mahimo tungod kay ang kasamtangang balaod nagpabiling dili matuis ug dili malalis.

Ang maong balaod nagbuot nga ang Cordova ug Consolacion magpabiling maglangkob sa ika-unom nga distrito uban sa dakbayan sa Mandaue. Kun tugotang mahimong lone district ang Mandaue, asa naman lang distritoha itipon ang Consolacion ug Cordova, busa nagtuo si boad member Ouano nga na-misinform lang ang iyang amahan ning maong isyu.

Ang mahinungdanon hinuon matud pa ni board member Ouano mao ang “people’s intitiative” o mayoridad nga kabubut-on sa kadaghanan nga ipaagi sa usa ka plibisito o uban pang politikanhong lakang nga uyonan sa balaod, maoy malagmit makapahimong lone district sa dakbayan sa Mandaue. Kay gawas niini, walay maayong laki nga politiko nga diha-diha makapahimong lone district sa Mandaue, sukwahi sa gituohan ni kanhi Mayor Pedong Ouano. WC (BANAT NEWS)