3 ka suspetsadong kawatan tiklo

CEBU, Philippines - Tulo ka mga suspetsadong kawatan ang nasikop sa kapolisan didto sa sitio Cambiohan, barangay Marigondon, dakbayan sa Lapulapu kagahapon sa buntag.

Ang mga nadakpan giila sa kapolisan nga sila si Ariel Sagarino, 20, Neil Lanog, 20, ug Bobby Sitoy, 18, pulos mga walay trabaho sa maong   lugar.

Nasakmit sa kapolisan gikan sa maong mga suspetsado ang 4 ka cell phone, laptop, DVD player, speaker, webcam ug broadband nga nagkantidad ang tanan og P40 mil kapin.

Ang biktima nga si Sonie Colantong, 37, nagtibi nga misumbong sa kapolisan nga samtang nangatulog sila misaka ang mga suspetsado sa ilang balay ug sa ilang pagmata nasayran nila nga gikiriw na sa mga suspetsado ang nahisgutang mga butang.

Gawas kang Colantong, may lain pa siyang silingan nga gibiktima gihapon sa maong mga suspek nga mao si Joegie Caratao, ug ang mga butang nakawat gikan sa iyang balay nahilakip niadtong mga nasakmit sa kapolisan.

Nasayran sa kapolisan nga nadestino sa Crime Against Persons Desk   nga gipangunahan ni PO3 Elmer Canillo nga ang trabaho sa mga suspek mao ang pagsuroy-suroy sa ilang barangay maadlaw, ug sa kagabhion ila dayon sak-on ang gitiman-an nilang mga balay sa mga kuwartahan ug kiriwon ang mga butang sa sulod.

Unya ang ilang mga makawat adto nila ibaligya sa Olango island ug sa lalawigan sa Bohol.

Ang mga suspek kinsa nahinanok pag-ayo sa ilang pagkatulog wala makaikyas dihang giposasan sila nila ni SPO2 Frederick Eslit, PO3 Hajir Bajan, PO2 Kent Lisen ug PO2 Dario Arias.

Nagpahayahay na ang maong mga dinakpan sulod sa prisohan sa kapolisan sa Lapulapu.