Utang sa kuryente gipakagamay ni Comendador

CEBU, Philippines - Gipakagamay ni Supt. Patrocinio Comendador, OIC Chief sa   Cebu Provincial Police Office (CPPO) ang problema sa bayranan sa kuryente sa Visayan Electric Company (Veco) human sila putli og suga niadtong Lunes tungod kay wala sila kabayad sa ilang bill nga balig P386,342.97, sulod sa usa ka tuig.

Si Comendador sa pakighinabi sa mga tigbalita mitataw nga nabayran niadtong Martes sa hapon sa PRO-7 ang Veco hinungdan nga gibalik dayon pagtaud ang ilang kuryente.

Apan matud niya nga wala siya masayod kung pila ang gibayran sa PRO-7 ngadto sa Veco.

Matud ni Comendador nga sa iyang nasayran kaniadto pang Marso sa miaging tuig wala na bayri sa Kapitolyo ang kuryente sa CPPO hinungdan dili kini maoy rason nga wala bayri ang kuryente.

Iyang giklaro nga status-quo diha sa Kapitolyo ug wala lang una tandoga ang 43 ka mga pulis tungod sa kamandoan ni PRO-7 Chief Supt. Ager Ontog.

Hinuon siya mipasalig nga iya kining tun-an pag-ayo aron ma-maximize ang paggamit sa mga kapolisan depende sa kapabilidad sa usa ka polis nga dili maapektohan ang serbisyo ngadto sa katawhan.

Niining iyang paglingkod isip OIC sa CPPO si Comendador miingon nga mangita siya og duha ka opisyal nga nagranggo og Police Inspector aron maoy iyang ibutang isip Finance ug Administration Officer.

Kini tungod kay sa pagka karon ang anaa sa finance ug admin officer diha sa CPPO mga Police Non-Commission Officer (PNCO).

Matud niya nga kinahanglang adunay makamaong modumala sa maong buhatan nga usa usab ka opisyal.

Lakip sa palambuon ni Comendador mao ang intelligence gathering nga Crime Scene Investigation Unit (CSIU) nga dili pa dugay gihatagan og sakyanan sa gobernador aron ilang magamit sa pagresponde unya sa mga alarma sa probinsya.

Iya usab i-minimize ang paggamit sa radio communication kay dali ra kining magamit kung adunay mga dagkong alarma nga motumaw unya sa probinsya.  - BANAT NEWS