Hubog nagsusapinday sa karsada nalatayan og bus sa hawak patay

CEBU, Philippines - Patay diha-diha ang usa ka 30-anyos nga lalaki human malatayi sa ligid sa Ceres bus ang lawas niini ug naangol usab ang laing 5-anyos nga batang lalaking tinun-an sa daycare sa duha ka managlahi nga aksidente sa kadalanan didto sa lungsod sa Alegria kagahapon sa kaadlawon ug sa milabay’ng hapon didto sa sitio Locon barangay Poblacion sa samang lungsod.

Ang namatay mao si Lino Cabales Eman alyas Ondoy, 30, molupyo sa nahisgutang lugar samtang ang drayber sa Ceres bus gimaneho ni Antonio Beton Carbahosa Jr.,48, molupyo sa Bagawinis, Villahermosa Negros Oriental.

Matud ni SPO3 Rutillo Cardona sa Alegria Police dihang nahinabi sa Banat News ang biktima naglakaw sa karsada nga hubog ug nagsusapinday ang linakwan dihang napunggit sa bus nga miagi sa maong lugar.

Gihulagway nga napasok sa ilawom sa sakyanan ang biktima hinungdan nga napislat ang hawakan niini dihang nalatayan sa duha ka ligid sa atras sa bus.

Ang mga paryente sa biktima maoy nakadiskubre sa biktima nga patay nang nagbuy-od sa karsada nga wala na madala pa sa tambalanan.

Samtang ang drayber boluntaryo dayung mitahan sa iyang kaugalingon sa kapolisan. (BANAT NEWS)