CEBU, Philippines - Mikunhod na karun ang kaso sa sakit nga typhoid fever kon sakit nga tipos nga miigo sa lungsod sa Alegria niining milabay’ng mga semana nga nakakalas na og dili mominos upat ka kinabuhi og daghan ang nalandig sa tambalanan.
Mao kini gipadayag sa hepe sa Integrated Provincial Health Office (IPHO) Dr. Cristina Gianggo human namatikdan niini nga gamay nalang ang nalandig ug nagpahiling sa tambalanan matag adlaw sulod sa milabay’ng mga adlaw.
Sukad kagahapon moabot nalang og 49 ka mga pasyente ang padayong nalandig sa district hospital sa lungsod sa Malabuyoc ug gani sa milabay’ng adlaw upat nalang ka pasyente ang nagpahiling sa maong hospital.
Masaligon ang IPHO nga hingpit nga masumpo ang typhoid fever outbreak sa maong lungsod kun padayunon sa mga molupyo ang ilang mga pahimangnu sama sa pagpabukal sa tubig mainom ug pagpanglimpyo.
Ang Department of Health -7 una nang mikompirmar nga ang kontaminadong tinubdan sa tubig sa mga residente maoy hinungdan sa pagtumaw sa sakit nga tipos gikan sa barangay Sta.Filomena ug Poblacion diin kapin sa 200 ka tawo ang nangalandig sa tambalanan. (BANAT)