Kapin P2M nga alahas gikawat

CEBU, Philippines - Gibanabanang dul-an P3 milyones nga kantidad sa mga mahalong alahas ang nasakiyo sa mga wala pa mailhing mga kawatan gikan sa usa ka panimalay sa Sesame St. sa Doña Rita Village sa barangay Banilad ning dakbayan.

Nagduda ang kapolisan nga posibleng adunay kemikal nga gi-spray ang mga kawatan diha sa sulod sa balay sa mga biktima aron sila makatulog og maayo ug dili mamatikdan ang pagsulod sa mga kawatan.

Ang pagpangawat nadiskubrehan nianang pagkabuntag alas-6 kagahapon apan gituohan sa kapolisan nga nahitabo ang pagpangawat nianang kaadlawon samtang nangatulog pa ang mga tagbalay. Ang mga biktima mao ang magtiayong Pedro Herrera Delantar, 49, ug ang iyang asawang si Cathy Delantar, 50.

Sumala pa sa kapolisan si Pedro mitug-an nga nangahanaw ang iyang Rolex nga relo nga nagkantidad og P500,000; usa ka Rolex Federrer version nga relo nga balor usab og P520,000; usa ka Muller nga relo nga balor P300,000 ug usa ka Armani nga relo nga balor og P80,000.

Samtang ang asawa niini nga si Cathy nawad-an usab og usa ka Rolex nga relo nga adunay adornong bulawan ug diamond nga nagkantidad og P600,000; usa ka singsing nga 5 carat diamond nga nagkantidad og P250,000.

Dugang sa nawagtang nga butang ni Cathy ang iyang shoulder bag nga may sulod nga cellphone nga nagkantidad og P12 mil; usa ka Canon digital camera nga nagkantidad og P15,000; iyahang non-professional drivers license, BDO master card ug BDO visa card.

Base sa gihimong imbestigasyon sa Theft and Robbery Section sa Cebu City Police Office, ang mga wala mailhing mga kawatan gituohang mikatkat sa paril sa balay dayon milahos sa kwarto sa mga biktima.

Matud pa nga diha miagi sa terasa ang mga kawatan ug pugsanong giablihan ang pultahan sa magtiayon ug gikuha ang ilang mga butang nga wala mabantayi.

Dugang nakit-an diha sa crime scene ang mga agi sa tunob diha sa paril sa balay padulong sa terasa nga gituohang iya sa mga kawatan. (BANAT NEWS)