Mga sakyanan gidaro sa 10 -wheeler
CEBU, Philippines - Naharos ang mga sakyanan, poste lakip na ang usa ka kapilya human kini gidaro sa usa ka Isuzu flatbed 10-wheeler truck nga dunay kargang mga kabilya kagahapon sa alas 2:30 sa kaadlawon diha sa dalan S. Osmeña tunga-tunga sa Pier 3 ug Pier 4 sa dakbayan sa Sugbo.
Ang nahisgutang truck nga nagtangag sa plakang GVY-963 gimaneho ni Jennifer Cornelio, 33-anyos, taga barangay Balod, lungsod sa San Fernando.
Si PO2 Marlon Abella nga nahinabi sa Banat News kagahapon nagkanayon nga base sa pasiunang imbestigasyon ni PO3 Edgardo Dicoy, ang nahishutang truck nagbiyahe diha sa lugar apan tungod sa kabug-at sa mga kargang kabilya mihangad ang atubangang bahin niini.
Sa maong sitwasyon wala na makontrolar ni Cornelio ang manobela hinungdan nga milahos kini ngadto sa mga nakaparadang jeepneys ug motorsiklo daplin sa karsada dayon ngadto sa traffic signal post miigo pa gyud ngadto sa metrohan sa tubig dayon sa poste sa kuryente ug sa kapilya una pa mihunong.
Hinuon matud ni PO2 Abella nga walay nangaangol sa maong insidente.
Matud ni PO2 Abella nga ang nahisgutang truck ilaha lang unang gi-hold kay basin og duna pay moanha sa ilang buhatan sa traffic division nga moreklamo. (BANAT NEWS)
- Latest
- Trending