Katalagman ning siyudad gi-monitor

CEBU, Philippines - Bayente kwatro oras nga nagpahigayon og monitoring ang Cebu City Disaster Coordinating Council ( CCDCC )sa nagkalainlaing barangay ning dakbayan nunot sa nagpadayong pagbunok sa uwan.

Ang gitutokan pag-ayo sa mga sakop sa CCDCC mao ang mga bukirang lugar ug ang mga molupyo sa daplin sa kasapaan.

Gibutyag ni Alvin Santillana, executive officer sa CCDCC sa Banat News nga sukad kagahapon sa hapon wala pa silay nadawat nga report nga adunay mga dagkong katalagman nga nahitabo mugna sa nasinating mga pag-uwan-uwan.

Hinuon matud ni Santillana nga adunay duha ka lugar sa bukirang bahin ang nakasinati og gagmay’ng landslide ug natabonan ang kadalanan sa barangay Buhisan ug sa Sityo Naga, sa barangay Pamutan.

Wala hinuoy nasinating dagkong kadaot sama sa naangol gawas lang sa pagkabara sa mga sakyanan sa lugar nga natabunan sa mga bato ug yuta ang karsada.

Gipasalig ni Santillana nga paspasan nila ang clearing operation aron kaagian dayon karong adlawa ang maong mga kadalanan.

Sa samang higayon gipahimangnoan usab ni Santillana ang mga molupyo sa bukirang bahin ilabina niadtong nahimutang sa bakilid nga lugar kalabot sa kapeligroso sa landslide tungod sa kahumok na sa yuta .sa maong mga dapit mugna sa nagpadayon nga uwan-uwan

Sa samang higayon gipasidan-an usab nila ang ang mga nagpuyo sa daplin sa kasapaan kalabot sa kadelikado niini sa panahon nga mokalit og bul-og ang dagkong baha.

Matud ni Santillana nga 24 oras nga bukas ang ilang command center sa City Hall aron pagdawat sa mga pahibawo kalabot sa unsa mang katalagman nga motumaw.

Sayo niini gimando ni Mayor Michael Rama nga ipamonitor ang kabarangayan sa dakbayan aron malikay sa dautang mga panghitabo mugna sa baha ug landslide ang katawhan. (BANAT NEWS)