Manila police papangayoo'g pasaylo sa law students

CEBU, Philippines - Gimando ni kanhi Undersecretary Paul Clarence Oaminal sa Dangerous Drugs Board sa Manila Police District (MPD) ang pagpangayo og public apology ngadto kang Jade Lazaga, ang usa ka law student kinsa sakop usab sa Akrho.

Gipalanog kini ni Oaminal human motahan ngadto sa kapolisan ug NBI ang suspek sa nahitabung pagpamomba atol sa milabay’ng bar exam didto sa De Lasalle University niadtong buwan sa Septiyembre nga mikalas og 40 ka mga barrister.

Sumala ni Oaminal nga karong mitahan na sa iyang kaugalingon ang suspek nga si Anthony Leal Nepomuceno kinsa sakop sa Alpha Phi Omega (APO) fraternity angay usab nga mangayo og pasaylo ang MPD gumikan sa pagpakauwaw niini sa mga Sugboanon sa pagpasangil kang Lazaga.

Dugang ni Oaminal lakip sa angay pangayoan og pasaylo sa MPD mao ang University of San Jose Recoletos (USJR) College of Law, Alumni Association, mga Sugboanon ug ingon man ang AKRHO fraternity diin si Oaminal usa sa mga opisyal niini.

Gipasalamatan hinuon ni Oaminal ang NBI ingon man ang Department of Justice (DOJ) tungod sa gipakitang professionalism niini pagdumala sa imbistigasiyon sa maong panghitabo. (BANAT)