Our Lady Of Fatima sa Portugal nia Sugbu

CEBU, Philippines - Miabot na dinhi sa Sugbu ang imahen sa Our Lady of Fatima nga gikan pa sa Portugal niadtong adlaw nga Martes, petsa 6, 2010 isip kabahin sa gipahigayon nga International Pilgrimage niini.

Ang buhatan ni Msgr. Cristobal Garcia ang pangulo sa Commission on Worship sa Archdioceses sa Sugbu ug Spiritual director sa Word Apostolate of Fatima nagkanayon nga unang gisulod ang Birhen sa Campus sa Cebu Technical University (CTU) ug gisunod sa Cebu Metropolitan Cathedral diin gipahigayon ang Santos nga Misa nga gisundan sa usa ka vigil.

Si Salod Contento usa sa mga opisyales sa Word Apostolate of Fatima dinhi sa Sugbu miingon nga ang orihinal nga imahe sa Our Lady of Fatima ilibot sa nagkadaiyang mga parokya sa probinsiya sa Sugbu.

Kagahapon didto kini gihatud sa San Vicente Parish sa Bato, Toledo City ug karong adlawa ibalhin na usab kini sa Immaculate Heart of Mary Parish sa Minglanilla.

Sa petsa 9 sa Oktobre, ang Birhen sa Fatima adto na usab dad-on sa Our Lady of Fatima Parish sa Basak, dakbayan sa Mandaue ug sa petsa 10 sa Oktobre adto na sad sa Saint Tomas de Villanueva Parish sa dakbayan sa Danao.

Sa petsa 11 sa Oktobre ang imahe sa Birhen ilabang gikan sa mainland Cebu ngadto na sa isla sa Bantayan ug dad-on sa Saint Peter and Paul Parish sa Bantayan.

Sa petsa 12 sa Oktobre adto na sad dad-a ang imahe sa San Vicente Ferrer Parish sa Bogo, Cebu.

Ug sa petsa 13 sa Oktobre nga mao ang katapusang adlaw niini sa pagbisita sa mga parokya anha himuon sa Sto. Rosario Parish sa dakbayan sa Cebu.

Sa pagka-alas 3:00 sa hapon iprusesyon ang Our Lady of Fatima gikan sa Sto. Rosario Parish subay sa P. del Rosario, Osmeña Boulevard paingon sa Fuente Rotunda, balik sa Osmeña Boulevard lahos sa R. Landon ug adto matapos sulod sa Cebu City Sports Center.

Sa alas 5:00 sa hapon ipahigayon ang usa ka Pontifical Mass uban ni Cebu Archbishop Ricardo Cardinal Vidal ug sa pagka alas-7 sa gabii ipahigayon ang Fatima Experience ug Farewell rites sa dili pa kini ibalik paingon balik sa Portugal.

Ang international pilgrim sa imahe sa Our Lady of Fatima dinhi sa nasud sa Pilipinas nagsugod niadtong Hulyo 1 ning tuiga hangtud sa Oktobre 13, 2010 nga nagsugod sa Luzon, gisunod ang Mindanao ug katapusan sa Visayas partikular na dinhi sa Sugbu.  – BANAT NEWS