CEBU, Philippines - Giawhag ni Provincial Board Member Thadeo Ouano ang Provincial Environment and Natural Resources Office (PENRO) nga mohimo og imbestigasyon sa quarry sa barangay Cogon, lungsod sa Naga nga gituohang maoy nakaingon sa nahitabong pagbaha nga mikalas og duha ka mga bata sa miaging semana.
Si Board Member Ouano nga maoy chairman sa committee on environment sa hunta provincial sa Sugbo mihimo sa maong awhag pinaagi sa gipangamahanan niining resolusyon.
Gipasabot niya sa iyang resolusyon nga duol sa quarry site sa JLR Construction and Aggregates Inc. ang dapit nga gibahaan niadtong Agosto 29, 2010.
Dugang pa ni Ouano sa iyang resolusyon nga ang nagdumala sa maong construction firm nagdumili sa pagluwat og pamahayag kalabot sa maong insidente taliwala sa mga pasangil nga ang quarry sa maong dapit ang hinungdan sa maong pagbaha.
Si Ouano mipasabot nga base sa mga taho nga iyang nadawat nga ang maong construction firm nga nag-quarry sa maong lugar napakyas sa pagbutang og dakong culvert ug gituohan nga kini ang nakaingon sa maong pagbaha sa maong dapit.
Matud pa ni Ouano nga gikinahanglan kaayo nga kahimoan kini og pakisusi kay tataw kaayo nga naggumikan sa negligence o kadanghag sa construction firm ang tanan.
Si Ouano miingon nga gawas sa Mines and Geosiences Bureau 7 nga mohimo og pakisusi, labing mahinungdanon usab nga ang kagamhanan sa lalawigan mopadala og mga sakop sa engineering department aron usab mosusi sa maong lugar. (BANATNEWS)