Kahugaw sa kadalanan sa siyudad gisaway

CEBU, Philippines - Kusganong gisaway ni Gob. Gwendolyn Garcia ang mga graffiti, vandalism ug lakip na ang mga murals sa mga koral sa nagkadaiyang kadalanan dinhi sa siyudad kay hugaw kaayo.

Matud pa ni Garcia nga dili maayo tan-awon sa publiko ang mga gipang-drawing o murals sa mga koral sa siyudad kay bati kini pagka-drawing ug bati usab ang mensahe.

Iyang gitataw nga ang nag-artist nga mipintal sa maong mga murals nagpadayag sa ilang kalagot sa kalibutan nga gihulagway ni Garcia nga makamugna og negatibong enerhiya sa mga pasahero ug makawagtang sa ka maayo sa adlaw sa mga motorista nga makakita niini.

Ang gobernadora nagkanayon nga wala siya makakita og kalainan sa maong mga murals sa mga vandalism o mga graffiti nga gipanghimo sa mga batan-ong mga miyembro sa fraternities ug mga gang.

Si Garcia nagkanayon nga mas maayo pa og pintalan na lamang ang mga kural og puti nga pintal sanglit dili man kaayo kini sakit tan-awon sa mga motorista.

Misugyot ang gobernadora nga mas maayo pa og tamnan og buwak ug mga bushes aron presko nga dayandayan sa daplin sa kadalanan.

Wala hinuon kini niya itambag ngadto sa iyang anak nga si Atty. Ma Christina Garcia Frasco nga nahimong miyembro sa Superbody Beautification Commission nga gipangulohan usab ni Mariquita Salimbangon Yeung.

Dugang pa sa gobernadora nga may nagpadayon nga programa sa Kapitolyo nag-evaluate sa kalimpyo sa matag lungsod ug dili gyud makakuha og puntos ang mga lungsod kun may mga vandalism o graffiti kay dili siya gusto og hugaw nga tan-awon nga lugar. (BANAT)